Los seis conceyos sidreros asturianos ufierten un completu programa p'atrayer a cientos de visitantes esta ponte de mayu
28 abr 2023 . Actualizado a las 11:34 h.La Comarca de la Sidra prepárase pa recibir la primavera con ún de los eventos más destacaos d'Asturies: la Selmana del Floriar del Pumar. Esti espectáculu natural de los primeros biltos florales nos pumares, que tiñen los árboles colos colores rosa y blanco de los pétalos, ye un auténticu prestu pa los sentíos y va poder esfrutase del 29 d'abril al 1 de mayu.
A lo llargo de trés intenses xornaes, los seis conceyos sidreros asturianos de Bimenes, Cabranes, Colunga, Nava, Sariegu y Villaviciosa ufierten un completu programa p'atrayer a cientos de visitantes mientres esta Ponte de Mayu. Ente les principales actividaes, inclúyense visites guiaes per pumaraes onde los participantes van poder pasiar y fotografiase ente pumares en flor y afayar los secretos del cultivu del pumar y les peculiaridaes de la cultura sidrera asturiana. Les places tán llendaes, siendo imprescindible la reserva previa al traviés de la web turística de la comarca sidrera.
Amás, pa complementar la esperiencia, numberosos restoranes de la Comarca ufierten menús especiales cola mazana y la sidra como protagonistes. Los comensales van poder tastiar platos tan interesantes como los Nuggets caseros de cabritu a la sidra, el Bacaláu en salsia de pimientos asaos y aire de sidra, o postres como'l Pecáu orixinal, ente otros, toos ellos acompañaos por Sidra con Denomación d'Orixe Protexida Sidra d'Asturies. Tamién va haber descuentos especiales na visita que van ufiertar dellos museos y centros espositivos de la Comarca a los comensales d'estos menús sidreros».
Esti eventu cunta cola collaboración de distintos organismos y entidaes pal so desenvolvimientu, ente les que destaquen el Conseyu Regulador de Denominación de Origen Sidra d'Asturies y la Cooperativa Campoastur, ente otros. Amás, esta edición va ser bien especial, yá que cada vez ta más cerca la posibilidá de que la Cultura Sidrera Asturiana llogre la perimportante reconocencia como Patrimoniu Inmaterial de la Humanidá. Pa inscribise nes visites y llograr más información puede dirixise a la web www.lacomarcadelasidra.com