Ta abierta nel Antiguu Institutu hasta'l 30 d'abril
25 abr 2023 . Actualizado a las 10:54 h.Anguaño, Cirque du Soleil cumple un cuartu de sieglu d'historia n'España. Dende 1998, 17 espectáculos de la compañía canadiana visitaron 22 ciudaes españoles y fueron esfrutaos por más de 9 millones y mediu d'espectadores hasta la fecha. Dientro del conxuntu d'actividaes y espectáculos col que la compañía canadiana celebra esti aniversariu, Xixón va acoyer hasta'l próximu 30 d'abril de 2023 la esposición itinerante Cirque du Soleil, más allá del espectáculu nel Centru de Cultura Antiguu Institutu, en collaboración col Conceyu de Xixón y Divertia.
Una exhibición que percuerre los 25 años d'historia de Cirque du Soleil nel nuestru país y qu'amuesa'l llau más social y desconocíu d'esta compañía d'artistes caleyeros de la pequeña ciudá de Québec que se convirtió nun nome conocíu en tol mundu, redefiniendo la forma en que'l públicu ve'l circu dende la so creación en 1984.
Na inauguración de la esposición que tuvo llugar esti xueves, Caroline Couillard, directora global de Rellaciones Públiques, Rellaciones Institucionales y RSC de Cirque du Soleil Entertainment Group, estimó la collaboración de la ciudá de Xixón, onde la compañía tuvo en seis ocasiones dende la primer vegada en 2004. «Ye un auténticu gustu inaugurar n'Asturies esta esposición y compartir con toos vós la rica historia de Cirque du Soleil. Dende fai cuasi 20 años Xixón siempres ocupó un llugar especial nel nuestru corazón y tamos encantaos de que forme parte de la xira del nuestru 25 aniversariu n'España col estrenu d'OVO esti branu na ciudá», dixo Couillard.
Couillard tuvo acompañada nesta velada pola alcaldesa de Xixón, Ana González, quien felicitó a la compañía pol so aniversariu y destacó que ye «un crisol de talentos, de nacionalidaes, d'etnies, de cultures, de llinguaxes artísticos que conviven nel microcosmos que viaxa con cada espectáculu allá onde va».
Xixón va recibir a finales de xunetu la visita d'OVO, un espectáculu que podrá esfrutase en formatu pabellón nel Palaciu de Deportes de La Guía, del 26 de xunetu al 6 d'agostu. OVO (güevu en portugués) esplora la guapura de la biodiversidá en tolos sos contrastes y vitalidá al traviés del día a día d'un grupu d'insectos, con poderosos grillos que reboten nos trampolinos o hipnótiques arañes que se retuercen dientro de la so tela, ente otros bichos. Dende'l so estrenu en Montreal en 2009, esti espectáculu foi vistu por más de 7 millones de persones en 155 ciudaes de 26 países distintos.