Nos tiempos que cuerren, nun ye fácil estremar nos medios de comunicación ente lo que dicen y lo que faen los dirixentes políticos de la sociedá. Menos entá en viéspores eleutorales. D’este miente, nun ambiente d’enfrentamientu ente candidatos, confúndense les propuestes y contrapropuestes programátiques o táutiques de los partíos y coaliciones. Ábrese una brenga endolcada en tensión verbal que tapez l’envís real de los protagonistes, énte los problemes de la ciudadanía.
El sofitu al asturianu ye ún de tantos temes na griesca política d’anguaño. Asina, hai un partíu nel país que sofita la oficialidá pa que seya como les demás llingües del Estáu. Llueu, hai unos grupos que tamién faen un apueste dafechu pola oficialidá y normalización del idioma.
Y otru que nun ve, o nun quier ver, les ventaxes que tien pa la reconstrucción d’esti territoriu en declive. Hailos qu’entá aprofien n’amenorgar l’estatus del idioma y les instituciones que lu defenden en cuenta de puxar pola igualdá real de los drechos llingüísticos de la población a la que dicen representar.
Asturies tiene unes grandes posibilidaes oxetives d’avanzar haza la media del marcu européu de referencia en munches cañes d’innovación, ciencia, cultura y actividaes de toles tribes col usu del asturianu. Una vegada que pasen les eleiciones, veráse si’l xuegu políticu dexa o nun dexa espeyar nel Parllamentu Asturianu la mayoría necesaria de diputaos favoratibles a la oficialidá.
Toos ellos saben que ye un pasu hestóricu de futuru vidable pa tirar del carru’l país. Tamién saben les dificultaes pasaes pa ponese d’alcuerdu en sacar alantre la reforma del Estatutu que permita la oficialidá. El bien común de los asturianos y asturianes ha primar sobre los intereses partidistes. Ello dizse como un mantra cada cuatro años. La xente distánciase de la política porque ésta separta lo que diz de lo que fai. Esa correspondencia, esa correllación, ye la que caltién a los habitantes d’esti pequeñu país verde na incertidume, porque torga les soluciones afayadices pa salir de la decayencia.
La nueva llexislatura ye tiempu enforma pa reformar l’Estatutu y poner al día la situación llegal de los idiomes que se falen nesta autonomía. Apurriendo asina la seguridá xurídica pa los falantes, la proteición dafechu del patrimoniu llingüísticu, xunto a la llibertá y la prosperidá arreyada que se mos vien ñegando dicagüei. Esi pasu, perimportante pa la calidá democrática asturiana, que pue tar tan cerquina.