El plumeru de la Pampa (Cortaderia selloana) ye una especie invasora que vieno de Sudamérica como ornamental nel sieglu XIX (Asturnatura) pa estendese per zones subhúmedes o semiárides, en llugares abiertos, asoleyaos, formando poblaciones denses qu’aumenten el riesgu de fueos. La xida ye l’espardimientu de dellos miles de semientes producíes por una sola planta hasta 25 km de distancia. Por exemplu, anguaño coloniza aries del oeste de Xixón, sobremanera nes zones abandonaes y soleyeres. Como denuncia, ente otros, la Coordinadora Ecoloxista d’Asturies.
En 2021 el Principáu retiró 1.232.240 exemplares que foron 14 tonelaes pa la so xestión como borrafes. Nes dos primeres fases del Plan d’arrincamientu (2018-2021) arrincáronse 6,2 millones d’exemplares del occidente y l’oriente del país. Na fase 3 que durará dicá’l 2014 fadráse lo propio na fastera central onde hai mayor densidá d’esta planta invasora.
La XICN (Xunión Internacional pal Caltenimientu la Natura) pide esfuercios mundiales pa lluchar escontra esta plaga d’espardimientu continuu y esponencial. Yá ta presente en toles comunidaes cantábriques, dende Francia a Portugal. Desplaza la vexetación autóctona alteriando hábitats y ecosistemes.
El Ministeriu de Transición Ecolóxica calca na so ocupación de tolos ambientes, tanto naturales como humanizaos. Amás de provocar alerxes respiratories na so dómina de floración.
La so presencia algama carrizales de ríos y dunes costeres de la Rede Natura 2000 (Ría del Nalón, Xagón, Rodiles) y otres zones protexíes. Poro, inclúise nel Catálogu Español d’Especies Esótiques Invasores.
Tamos nuna emerxencia ecolóxica n’Asturies y nel mundiu, dende EE.XX. a Nueva Zelanda, China y cuasi toa Europa.
La coordinación de les autonomíes del Cantábricu ye clave pal desaniciu d’esta especie invasora per aciu de les midíes téuniques yá conocíes poles alministraciones. Solo d’esta miente Asturies pue tornar a ser un paisaxe verde ensin los blancos plumeros orixinarios d’otru continente.
Unes plantes que pasaron d’orniatos a invasives col so espardimientu pola mor del cambéu climáticu.