Nel 2009, el Tratáu de Lisboa nel so artículu 29 garantizaba la igualdá «ente homes y muyeres en tolos ámbitos» y alvertía qu'esi principiu d'igualdá nun impidía'l caltenimientu o l'adopción de midíes qu’ufiertaren «ventayes concretes a favor del sexu menos representáu». Asina mesmo, un añu más tarde creóse l’Institutu Européu de la Igualdád de Xéneru que trata de garantizar que la igualdá ente homes y muyeres seya una realidá tanto na Xunión Europea como fuera d'ella. Magar ello, nun hai garantíes de la igualdá de xéneru plena ente muyeres y homes en nengún país. Sicasí, l'axenda europea ta trabayando porque de 2020 a 2025 se desanicien estes desigualdaes. Ye verdá qu’hebo un progresu global hacia la paridá de xéneru na educación, pero les distancies siguen siendo grandes ente quien vive en zones rurales y urbanes y ente ricos y probes, polo que paez un oxetivu imposible d'algamar dafechu en tan pocu tiempu.
Según l’Informe Global sobre Crisis Alimentaries de 2021, 193 millones de persones carecieron inseguridá alimentaria aguda y necesitaben ayuda urxente pa sobrevivir. D'elles, el 70% a nivel mundial, son muyeres y neñes. Les implicaciones de la fame nun son solo alimentaries. Según esplica la organización, a midida que les families y les comunidaes se ven sometíes a los impactos de la fame, les neñes y les rapaces tienen más probabilidaes que los neños de dexar la escuela y cuerren el riesgu d’embaranzos non queríos y de «sufrir violaciones de los sos derechos como la violencia por razón de xéneru o la esplotación sexual». Esto tien consecuencies graves pa la so salú mental y física y el so bienestar xeneral. Según la Coalición Mundial pa la Protección de la Educación contra los Ataques, ente 2015 y 2019, en 21 países alumnes y profesores fueron blancu directu, nes escueles o nel camín escontra elles: bombardeos d'escueles de neñes, secuestros, violaciones, acoso... Traumas, mieu, inseguridá y estigmatización faen que dexen la escuela -dacuando pa siempres polo que queden espuestes a otres graves formes de violencia de xéneru.
Ensin educación les rapaces tienen 3 veces más posibilidaes d'acabar casaes con un home mayor qu’elles enantes de los 18 años, lo que les obligará a dexar d’estudiar. Como consecuencia de la crisis, estímase que pue haber 13 millones más de matrimonios infantiles nos próximos 10 años y la mayoría enxamás volverá a la escuela, lo que supón la pérdida del so potencial. N’América Llatina 1 de cada 4 neñes cásase enantes de los 18 años. La cifra malpenes camudó nos últimos 25 años. Según la Comisión Económica p’América Llatina y el Caribe (CEPAL) pal añu 2030 va ser el segundu índiz más eleváu d'uniones infantiles, por detrás namás d’África Subsahariana. Ello ye que la Plataforma de Acción de Beijing establez el matrimoniu infantil como una evidente violación de los derechos de les neñes.
Per otru llau, según la Unesco 118,5 millones de neñes en tol mundu tán entá ensin escolarizar, amás de que les muyeres siguen representando casi dos tercios de los adultos que nun saben lleer, provocando coles mesmes una menor asistencia a la escuela y mayores tases d'abandonu escolar. Dellos países pierden más de mil millones de dólares al añu por non educar a les neñes al mesmu nivel que los neños yá que la educación de les neñes fortalez les economíes. A la escontra, mientres que nel mundu representen namás un 35% de les persones que siguen estudios de enseñanza superior en STEM (ciencia, tecnoloxía, inxeniería y matemátiques), les muyeres representen menos del 30% de los investigadores científicos. Como cada vez más les profesiones esixen conocimientos técnicos, la baxa participación de les muyeres nos STEM pue dexales nuna situación de desigualdá respeuto a los homes. N'España namás el 16% de profesionales de la estaya de les STEM son muyeres, lo que sigue suponiendo un problema na educación universitaria. D'esta miente, Elena Lasarte, profesora titular del Departamentu d'Economía Aplicada de la Universidá d'Uviéu, camienta que «nun ye bono que'l 75% de les estudiantes de Medicina sían muyeres». El profesoráu y les families repiten los estereotipos de que les neñes son meyores en Medicina qu’en Matemátiques y llega a interiorizalo como cierto.
¿Tán los políticos dispuestos a algamar esa necesaria igualdá? Ensin dulda les muyeres que se dediquen a la política saben la necesidá de tomar midíes nesti tema. Según l'informe Sexismu, acosu y violencia escontra les muyeres parllamentaries, hai unos niveles esmolecedores de prevalencia de comportamientos y aiciones de violencia sexista contra parllamentaries en tol mundu, qu'inclúin non solo la violencia sicolóxica, sinón tamién otres formes de violencia: sexual, física y económica, daqué que torga a estes muyeres poder facer el so trabayu en condiciones de llibertá y seguridá. Asina que nun choca qu'en munches ocasiones les muyeres refuguen participar na vida política.
De lo que les encuestaes nun tienen dulda ye que la educación ye un mediu necesariu pa camudar les mentalidaes y les costumes, yá que combaten la discriminación y alluguen una cultura d'igualdá y tolerancia. Y ye qu’enseñar los derechos humanos y l'igualdá de xéneru a los neños y les neñes dende bien pequeños va contribuyir a establecer rellaciones de non violencia y respetu ente los sexos en tolos sectores d'actividá. Tando asina la situación ye urxente, tal como propón la ONU, camudar los estereotipos de xéneru: non solo pa que les neñes cunten con les mesmes oportunidaes que los neños, sinón tamién pa romper con postures arcaiques que torguen el progresu humanu. Pero ensin dulda, necesítase que los centros educativos seyan d’una vegada los espacios socioeducativos onde les futures xeneraciones dende bien pequeñinos deprendan a cuestionar les discriminaciones por razón de xéneru, construyendo modelos de rellación colos demás y consigo mesmos dende'l respetu y l'igualdá. Como la educación de les neñes y les muyeres tien el poder de salvar vides y un efeutu multiplicador qu'amenorga la probeza, la mortalidá materna ya infantil y el matrimoniu precoz, son munchos los organismos que, como la UNESCO, piden qu'haya más atención a la igualdá de xéneru en tol sistema educativu en rellación col accesu, el conteníu, el contestu y les práctiques d'enseñanza y aprendizaxe, les resultancies d'esti aprendizaxe y les oportunidaes de vida y trabayu.