Estes son delles temátiques qu’afiten la celticidá prerromana d’Asturia, aniciu de l’Asturies de güei: castros, símbolos tradicionales, cultura atlántica, toponimia, arqueoloxía, etnoloxía, etnografía, mitoloxía, orfebrería, hestoria, onomástica, armamentu, ente otros, como dellos vezos y construcciones de la vida rural, por exemplu.
Entidaes culturales que faen un gran llabor d’investigación y divulgación como Belenos cola revista Asturies. Memoria encesa d’un país, la Lliga Celta d’Asturies col cartafueyu Astor, asoleyen una llarga experiencia n’amosar ñicios de celticidá ástur.
Tamién la nomada música celta ye un productu que dende los años 70 del sieglu XX asitien a Asturies nel marcu internacional intercélticu européu del Arcu Atlánticu.
El Festival Intercélticu d’An Oriant / Lorient (Bretaña) ye la mayor amuesa nesi sen, nel que precisamente l’añu pasáu dedicóse-y l’añu a esti país, la nación celta añal como miembru de plenu drechu, asina como Galicia, Bretaña, Irlanda, Cornualles, Gales, Islla de Man y Escocia, igual que n’otros foros d’esti calter.
Hai cientos de castros ensin escavar sobremanera nel centru y nel oriente del ríu Seya. Oficialmente tán censaos al rodiu d’unos 300, pero l’esfuerciu investigador ye mínimu, en comparanza con Galicia onde descubrieron miles nes caberes décades.
Dende esti artículu d’opinión, faigo un llamáu a quien correspuenda pa qu’abran les escavaciones, investigaciones y rehabilitaciones de los restos prerromanos, a lo menos con igual ciñu col qu’hasta agora se fizo colos restos romanos nel país cuasi n’esclusividá.
El pasáu celta del país amerita un respetu, xunto a la dedicación de más recursos, y más si ye mui anterior a la dómina d’anguaño.
Porque la época de la Edá del Bronce final y la Edá del Fierru, supón un estratu milenariu de la hestoria más averáu a los raigaños del territorio. Qu’amás mos venceya a otros países europeos de la oriella atlántica.