Toni Cantó arremetió va unos díes dende la cadena 7NN escontra l’asturianu. Dixo que n’EE.XX arrestaron por mentirosa a una intérprete de signos al inventar un llinguaxe y, ensin embargu, como equí somos tan tolerantes, anque «tán inventando’l bable n’Asturies naide visita la cárcel». Ser mentirosu y nun tener memoria, o camentar que’l restu de los mortales nun la tenemos, déxalu n’evidencia. El casu ye que Cantó falsificó’l so currículo: inventóse una llicenciatura en Pedagoxía, polo que’l Partíu Popular pidió la so dimisión como diputáu nel Congresu por mentir. L'entós voceru parllamentariu del PP, Rafael Hernando, tuiteó: «¿Va pidir Rivera al trésfuga Toni Cantó qu’arrenuncie a la so candidatura y que dimita? Nun son pedagogos, son demagogos”. Pero Cantó, que nun se dio por aludíu, dixo que’l PP namás-y lo pidió porque’l partíu naranxa esixó la dimisión de la que nesi momentu yera presidenta de la Comunidá de Madrid, Cristina Cifuentes, pol falsu máster de la Universidá Rey Juan Carlos. Él nun ye pedagogu, pero sabe bien qu’ente mentirosos anda’l xuegu. Pero, amás de falsu pedagogu y mentirosu, Cantó ye dau a arrimase al árbol que más solombra proyeuta, asina que viendo’l deterioru de Cs, coló igual qu’una rata pal PP cuando vio que’l barcu naufragaba. Ye’l cuartu partíu que pisa y conociéndolu nun va ser l’últimu; camiento que vamos velu en VOX dientro de poco. Ello ye que’l PP tuvo que desdicise de les sos propies palabres. Los mesmos que lu denunciaben y censuraben por tresfuguismu, y que soportaron que Cantó los llamare ineficaces y corruptos, viéronse obligaos a da-y la norabona cuando’l PP madrileñu lu nomó direutor de la Oficina del español, un órganu de nueva creación que, con muncho aciertu, foi calificáu pola oposición de «chiringuitu ad hoc». Cantó cobró un sueldu que perpasó los 75.000 euros anuales, más qu’un ministru, y anque dalgunos dicen que nun fizo nada, equivóquense, dedicóse a tuitear babayada tres babayada plagaes d’errores ortográficos, porque anque domina l’arte de la mentira, ye nulu na pedagoxía y na escritura, polo menos en castellán. Vamos da-y el conseyu que’l el señor Rajoy anotó a los periodistes cuando-y preguntaron si diba pidir la dimisión de Cifuentes por mentir dempués de la petición que-y ficieren dellos políticos como Cantó: «Conseyos vendo que pa mio nun tengo».
De toles formes, reconozo que me desilusionó esti actor metíu a políticu. Pensé que tenía más imaxinación pero nin siquiera tuvo inxeniu pa inventar una mentira más orixinal y copió lo que VOX dixo va tiempu: «Un grupu de progres inventó’l bable», anque ye verdá qu’él pon dalgo de la so collecha: «y naide va pa la cárcel». Pese que-y gusta muncho la llibertá d’Ayuso, esa de tomar cerveces nes terraces, lo de meter na cárcel a la xente ensin motivu presta-y más, asina que camienta que’l presidente del gobiernu d’Asturies debía tamién ser apresáu, nesta ocasión pola so manera de vistir. Supongo que con esi sueldu tan descomanáu que-y regaló la señora Ayuso fízose mui sibarita.
En fin, yo nun voi pidir que lu metan na cárcel por mentirosu yá inorante, pero sí quiero facer una propuesta: obligalu a asistir a un cursu sobre la llingua y cultura d’Asturies. Primero qu’estudie un poco d’historia. Podría entamar col orixe del asturianu. Va conocer que nel sieglu X sábese que’l documentu «Nodizia de Kesos» ye onde se ve’l nacimientu de la llingua. Va descubrir que col Fueru d’Avilés en 1155 déxase d’escribir en llatín y entamase col asturianu y que nos sieglos postreros, XII, XIII y parte del XIV, los testos de caráuter xurídicu tán escritos n’asturianu, al empar que l'idioma va estendiéndose nos nomes de los llugares y los nomes de les persones, topónimos y antropónimos, y nel léxicu de les coses materiales. Va quedar plasmáu cuando-y despliquen que foi nel sieglu XIV cuando entamaría la castellanización d’Asturies cola llegada de funcionarios y mandatarios unviaos pola alministración castellana. Y a la fin, va entender cómo’l castellán foi un poderosu instrumentu políticu al serviciu de los intereses de la Corona, qu’entamó colos Reis Católicos qu’impuxeron a los súbditos en tolos sos territorios peninsulares y d’ultramar la gramática castellana; nel sieglu XVIII Felipe V impulsó la Real Academia de la Lengua Española, mentanto que Carlos III promulgó una pragmática sanción qu’obligaba a utilizar el castellán na enseñanza. Tamién tien qu’estudiar la vida y obra de Xovellanos, un gran ilustráu, estadista, un políticu intelectual y reformista que lluchó pa que n’España desapaecieren les tiniebles de la inorancia y la manipulación fácil. Tengo mieu que llegue a vese como un Xovellanos 2, porque si del xixonés llegaren a dicir que yera un auténticu peligru pa la sociedá, un home «abominable» que lleía llibros prohibíos, a él tachámoslu «inxustamente» d’inorante, babayu fatu, bilordieru, faltosu, charrán, mazcayu y nun sé cuántos axetivos más. ¿Cómo-y sentará qu’esti ilustráu dixera al rodiu de 1888, cuando preparaba’l proyeutu del diccionariu asturianu, que «ye la llingua viva del nuesu pueblu; mamámosla toos, por dicilo asina, cola primer lleche» ¡Vete tu a saber! ¿Y que va dicir cuando descubra qu’Alfonso XIII namás cumplir la mayoría d’edá roblare un documentu que prohibía a los maestros enseñar cualesquier idioma que nun fuera’l castellán, col riesgu de perder la so plaza si reincidieren? A lo meyor fala de llibertá de pensamientu. Toi segura de que va inventar dalgo pa xustificar que’l rexime franquista dexare al asturianu na absoluta precariedá.
Depués d’esta formación, taría obligáu a conocer y respetar la Constitución española, les resoluciones del Conseyu d’Europa y les recomendaciones de la Carta de les Llingües Minoritaries que llamen a protexer al asturianu. Con toa seguranza va quitase-y’l rixu de mandar pa la cárcel a los que lluchen polos derechos constitucionales. Y pue qu’hasta pida, como’l presidente d’Asturies, «el respetu pol asturianu pa que ningún estremismu ranciu» ataque a una Comunidad Autónoma que, como Asturies, pue presumir de tradiciones y cultura milenaria. Y va ser el primeru en defender la nuestra llingua, porque depués d’estudiar tanto nun-y va quedar otra qu’entender que ye patrimoniu de la humanidá, que lleva tresmitiendo cantares, histories, poemes… a lo llargo de los sieglos porque contién un cuerpu acumuláu de conocimientos, sabiduría y valores tradicionales qu’hai que protexer. Pue que Cantó se vuelva un Nichleu-nuggo, palabra de la llingua Aka, una llingua indú con namás 2.000 falantes; ye dicir, un conseyeru d’Asturies, sabiu, compasivu y tolerante. ¿Va tar d’alcuerdu con Forges cuando col so maxistral inxeniu desplica nuna viñeta que la xente que-y moleste que s'escriba y fale n'asturianu ye la mesma xente a la que-y molesta que se fale, s'escriba y hasta que se piense? Nun toi segura, anque intuyo que va mirase muncho lo que diz nel so programa de televisión ya que va tener claro que n'Asturies la meyor venganza pa la xentecaya que nos fai una grave ofiensa ye demostra-yos lo equivocaos que tán.