Nun vaigamos a gamusinos, la cuestión ye otra

Tamos nu mediu’l run-run que se formó dende que Rusia mandare’l so exércitu a conquistar Ucrania. Y entemécense comunicaos de les axencies de noticies con opiniones y declaraciones nel medio d’un enguedeyu. Preocupa la probe xente y hai dellos que falen de les consecuencies económiques, como si se tratare d’otru acontecimientu de los que faen que suba o baxe la bolsa. Quiero da-y más ángulu a  lo que ta pasando a la vera del Dnieper y el Danubio. Ye la mi opinión, col ánimu de repensar coses perimportantes, de más altor, que ye obligao curiar.

A L’ESCONTRA LES GUERRES

La historia de les guerres europees ye bien llarga y fizo surdir la idega de que nun se repitieren enxamás. Asina foi que los pas fundadores de les Comunidaes Europees naguaren pa facer de los intereses en comuña un gran espantaxu que tornare cualisquier batalla. Nel surdimientu de les distintes organizaciones y de los tratos que fueren zarrando taben el carbón y l’aceru, pero tamién la defensa. Al cabu la Segunda Guerra Mundial chamos embaxu l’enemigu nazi, pero fue medrando la dixebraura ente la U.R.S.S. y otres potencies aliaes, lo que vino a facer medrar los gastos y les organizaciones militares.

La necesidá de tener una defensa común pa Francia, RFA, Italia y Países Baxos llevó a negociar  lo qu’había ser la Comunidá Europea de Defensa. Valtóla’l parlamentu francés con gran tracamundiu de votos que nun son a entendese dende la forma de producise normalmente los partíos políticos. Quedó entós la OTAN como fórmula militar nel ámbito de los paises nomaos, mal que colos Estaos Uníos tirando del ramal.

Nun ye menester traer aquí más que l’empiezu, bien sabemos de les tensiones de la nomada Guerra Fría, del Telón d’Aceru y de les bases americanes espardíes dende la Península Ibérica a Centroeuropa. Lo que sí puedo dicir, y pocu se sabe, ye que la Comunidá Económica Europea (CEE) y el Conseyu d’Ayuda Económica Mutua (CAEM o COMECON) nun se reconocieron mutuamente hasta 1988, cuando yá taba la Perestroika faciendo por buscar otru camín nel dominiu soviéticu.

UN ATERIZAXE FORZOSU NA UE

L'estrapayamientu la URSS abrió cola década de 1990 la caxa los truenos: dellos estaos queriendo arimase a la Unión Europea, mesmu a la OTAN, y un cambéu escomanáu nel mapa políticu del continente. Cuéntase si se firmaren coses, de las que nun tengo referencia direuta, al rodiu la OTAN. Sí que ye una realidá que conozo cómo los mas de los Paises d’Europa Central y Oriental (PECO) se arimaron al procesu fuerte d’integración europea, tras el rompimientu del COMECON. Asina ye como, amás del casu especialísimu d’Alemania, son dellos países, enantes lligaos a la URSS, los qu’aportaren a la Unión Europea nel añu 2004. Queda entós dientro d’esta la costa báltica, con Lübeck, Riga, Gdansk y tantes otres partes hanseátiques, que francien en forma l’accesu ruso al Már Bálticu.

Sicasí, puede dicise que la Federación Rusa tuvo siempres enfotada en caltener un pasillu neutral ente sí mesma y la UE, dende’l Mar Bálticu al Mar Negru; asina, nun viere precisamente con gozu que Letonia, Lituania y Estonia entraren na Unión Europea. Los rusos fueron saliendo d’aquellos países bien seliquino, dende 1991 hasta final del sieglu, y tres de cuatro decaes nes que tuvieren anexionaos a l’URSS. El progresu de los tres pequenos estaos ye llamatible y tán integraos dafechamente na Unión Europea, sin dar problemes de ningún tipo. Lo que si vienen diciendo dende siempres ye que Rusia tien el vezu d’espardise de nuevu cuantu pueda.

ENTE BOMBES Y MISERIA

Agora tamos nun escenariu endemoniáu, ta l’exércitu de la Federación Rusa entrando pela fuercia n’otru país, y mesmu l’exércitu d’Ucrania que la so población defendiendo cuantu pueden el so territoriu. La primer gran consecuencia ye la perda de cualisquier seña de raciociniu, d´humanidá, y la montonera de vides humanes segaes de cuayu, de les condiciones pa poder siguir viviendo na casa d’ún, mesmu la marcha  a la carrera enfilando a Polonia, Rumanía, Moldavia y onde se pueda, y la negación del presente y d’un futuru pa los más de quienes tán siendo atacaos. Quiero poner enfotu nesto, porque somos mui daos a pensar si nos van subir el preciu la gasolina, si los piensos van tener que venir d’Estaos Uníos, si van movese menos los turistes, o coses pel estilu. La guerra, la muerte, la miseria de los nuesos vecinos ye lo principal. Y la posibilidá de que les escopetes que carga’l diañu lleven a mayor conflictu, pongan en riesgo la seguridá nuclear, prendan la suelta d’armes químiques o biolóxiques, o afeuten dafechamente a tol mundiu, ye daqué que nun quermos imaxinar, pero que naide nos da fe de que nun seya posible.

NUN NOS VALIMOS COMO ANTES

Una vez comentao lo perimportante, podemos entrar na primera derivada que se mos ocurre: l’esmolecimientu xeneral y la repercusión de cuanto pasa n’Ucrania nos equilibrios poco seguros del mundu enteru. Y surden entrugues que naide nun respuende, ¿Qué va facer China? ¿Cuánto vamos tener que gastar n’armamentu? ¿Qué seguridá tenemos del suministru d’alimentos? ¿Cómo vamos facer p’atender tantu movimientu de población? ¿Qué consecuencies van tener les nueves condiciones d’aislamientu de Rusia?. Son munches preguntes y hai que se tentar la ropa pa contestales. Tou mos lleva a una primera conclusión que nun podemos refugar: ta armándose un tingláu al que nun se-y ve salida y la mesma incertidumbre que aparez, coles preguntes diches, ye d’una importancia que nun valoramos lo suficiente.

Si vamos a lo que ye’l día a día, sin mirar más p’allá, topámonos con una riestra de consecuencies que yá formen parte de les preocupaciones de les families, de les persones, de les empreses y de los gobiernos. Una sociedá que depende de coses que nun produz tien los pies de barru. Basamos la produición y el nuesu bienestar nunconsumu pergrande d’enerxía de toa miente, pero la más d’ella tien de venir de fuera la Unión Europea, mesmu de Rusia,tolo cualo danos problemes de seguridá de suministru y de preciu. A la gueta la enerxía van los camiones, l’agricultura, l’aceru… casi que toes les produiciones, y parar delles puede tener efeutos encadenaos.

Van ser importantes, como nun pudiera ser d’otra miente, les nueves importaciones pa sustituir les que veníen d’Ucrania y de Rusia, como queden casi que pesllaos esos mercaos, tien d´haber subíes de precios, de secute de costes y tendrán que dir axustándose toles variables. Ye momentu nel que los especuladores andarán frotándose les manes, que muelen mesmu cuando sube que cuando baxa la marea, y tendremos qu’organizanos de distinta manera. Pero ye perimportante n’Economía tomar en seriu lo que piensa la xente, porque tien consecuencies. Y atalanto ciertes idees proteccionistes, hasta diría qu’autárquiques «vamos facer por que nun mos afeuten les coses que pasen fuera la nuesa tierra». Naguemos por que nun tenga estu munchu recorríu, mal que verdá ye que la llargura de la nomada «cadena de valor» pon en peligru suministros que dependen de demasiaes coses. Vímoslo l’añu pasáu, a cuenta l’atascu d’un barcu nel Canal de Suez, venlo los británicos por mor del Brexit, tuvímoslo bien presente cuando la COVID19 fizo necesarios bienes fabricaos na otra punta’l planeta.  Con ello y con tou, van producise dalgunos cambios mesmu na produición que nos movimientos de mercancíes, pero non tantos como los que falen d’un tracamundiu, de la necesidá de volver del revés polítiques pernecesaries a l’escontra del cambéu climáticu o de l’apertura comercial.

MÁS PERRES PA CAÑONES Y TAMIÉN DALGUNES PA MANTEIGA

La entruga económica primera sofitábase pedagoxicamente na alternativa d’unu u otru, dando a entender que lo que s’emplega nun sentíu nun puede aplicase al restu, ye lu que se noma «coste d’oportunidá». Per otru llau, los que manden faen los presupuestos, gobiernos y parllamentos son los que deciden cómo gastar les perres del común y cómo se financia el gastu.

Ún de los renglones que va camudar ye’l del montu de dineru emplegáu pa la defensa. Acordies colos datos del Bancu Mundial, el gastu de los estaos nel so exércitu vien a ser del orde del 2% del PIB dende hai un cuartu sieglu, la metá de lo que yera en 1980 y una tercera parte de lo que fuera allá por 1960.  Dellos países árabes, Israel y Estaos Uníos destaquen, pero los estaos europeos con exércitu más dotáu económicamente son Francia y el Reino Uníu, al par de la media del mundu enteru, pero los más andamos per baxu. La media mundial de gastu militar ye`l 2,4% del PIB, Estaos Uníos emplega’l 3,7%, la UE un 1,6%, y dientro d’ella Irlanda gasta solo un 0,3%,  Suecia un 1,2%, Alemania Holanda y España el 1,4% y Finlandia el 1,5. Nun hai que ser adivinu pa saber que van subir esos porcentaxes, quitando aplicaciones presupuestaries d’otros llaos y subiendo contribuciones.

Otros problemes que tán viéndose son los que finquen na necesidá de suministrase con seguridá de coses básiques, como la enerxía y los alimentos. Hai polítiques bien fondes na UE al respeutu, pero nun sería raro qu’hubiera que les axustar nel nuevu escenariu. Venimos de decidir da-y puxu a les centrales nucleares y al gas, como formes de transición, pero les circunstancies apunten a que nel plazu más curtiu tendrán d’aprovechase recursos propios, nun hai muncho onde elexir. L’allargamientu la vida útil de cuanto hai tendrá que combinase con importaciones d’otros estaos, mesmu Estaos Uníos, y el alza los precios puede poner a trabayar formes que nun daben réditu con menores espectatives d’ingresos, como’l fracking. Per otru llau, l’agricultura, entendía en sentíu ampliu, ye destín de fondos europeos a mamplén dende cuantayá. Pero l’enfotu del empiezu, qu’amestaba el procuru por nun dexar atrás a la xente del campu cola necesidá de garantizar el suministru, camudó dafechu. Hai años, y sobre tou dende la Ronda Uruguay, que tal parez que fuere una política social o mediuambiental, o nin eso, de autoxustificación. Págase munchu dineru por bienes superiores, agora ta por ver si hai otros necesarios que pudieren ser más teníos en cuenta, daes les obligaciones contraíes en negociaciones internacionales y, al par, la necesidá de nun depender tanto de los demás, con conflictos a la vera. Nun van volver les montañes de manteiga de les que se falaba nos ochenta, pero de xuru que va ser necesario plantegase daqué, magar que sabiendo como sabemos qu’Estaos Uníos tien gran interés en valtar cuantu pueda los cultivos de lo qu’ellos pueen vendenos, como los cereales.

Les variaciones de los valores en bolsa, la convertivilidá del rublu y el cambéu nos pagos internacionales son otres de les estayes a trabayar de nuevu n’estos años vinientes. Pelo pronto, el Banco Central Européu parez que ta camudando la política de facer pola deuda de los estaos y tampocu va suxetar el tipu d’interés como antes. Bien puede dicise que yera daqué no que se pensaba primeru de que se principiare l’invasión d’Ucrania, que-y da más puxu a esi determín.

LA ECONOMÍA COMPARADA

Les consecuencies van ser males pa los más de los estaos, pero convién ver en qué midía tienen estos llográu un nivel económicu que-yos permita sofitar les fórmules pa retrucar la crisis que llega. Y lo raro ye que si miramos pa la Federación Rusa, tien menor renta per cápita en 2020  (10.126,7$) que Rumanía, mentantu que dos de les repúbliques báltiques pasen de los 20.000, a los que casi llega Eslovaquia. El PIB rusu nun llega a superar l’español un 16%, y mal podríemos imaxinanos tentando d’espandinos militarmente, por más tradición que tuviéremos. Rusia tal parez un d’esos vieyos fidalgos de la nuesa tradición social y lliteraria que tiníen que facer por aparentar lo que nun yeren. El desastre social y económicu que se-y puede venir encima a la población rusa nun tien comparanza pa colos beneficios que pudieren algamar, hasta nel meyor de los casos, por ponese a exercer de potencia ensin selo. Y ye daqué que Putin ta faciendo dende que les tropes ruses entraren en Chechenia casi al par del cambéu de sieglu.

Les midíes de munchos estaos, la perda de comerciu exterior, la corta del sistema de pagos SWIFT, la devaluación del rublu raspiando la no convertibilidá, la suspensión de negociu de munches empreses pa con Rusia y tantes otres van tener un efeutu que habrá que ver cómo ye interpretao pe la xente. Pero van desixir esfuerzos escomanaos p’afuñar si Rusia quier caltener un exércitu d’ocupación al par del esbarrumbamientu económicu del que venimos de falar.

Ucrania, nun fai falta precisalu, queda ensin aparatu productivu, cola perda importante de capital humano, ensin munches viviendes, sin salida al mar y, lo que ye bien peor, con gran cantidá de muertos, formando un círculu viciosu al que solo l’ayuda foriata va poder pone-y arreglu.

UN MAPA QUE VUELVE A CAMUDAR

Son importantes les consecuencies en importaciones, precios, localización, tipos de cambiu, tipos d’interés, etcétera, pero ta penriba el cambiu que se da nel mapa físicu y na organización de les relaciones internacionales.

Si miramos al mapa d’Europa, fuera unu al empiezu´l Sieglu XX y tuvo nuevos debuxos por delles vegaes. Dende’l añu 1990 fundióse Alemania, separtáronse Chequia y Eslovaquia, esplotó l’enguedeyu de Yugoslavia, y agora nun sabemos ónde poner la llende de Rusia. La frontera de la UE con Rusia yera grande: Finlandia, Estonia, Letonia y Lituania, pero agora tal parez qu’a Finlandia y les repúbliques báltiques van xunise Polonia, Eslovaquia, Hungría y Rumanía como estaos que toquen con Rusia (y Bielorusia, que tal paez que ye lo mesmo). Esí ye’l cambiu de fronteres. Pero hai otru más fonderu, el que tien que ver con un nuevu escenariu internacional.

Nun vamos repasar cómo se organizare´l mundiu tres la IIGM, nin el número d’estaos que nacieren con descolonizaciones, nin el rompimientu de Bretton Woods, nin el de la URSS, del que dalgo se trata al empiezu d’esti artículo. Pero nesti sieglu vimos la puxanza de China, l’apartamientu de l’Organización Mundial de Comerciu en favor d’acuerdos bilaterales y agora un órdagu de Putin, precedíu de l’anexón de Crimea hai unos años. Nun podemos pensar que les coses van siguir como antes, la ONU amuesa’l mesmu papel secundariu de tantos años mentantu que fai falta ver cómo aposienten los nuevos equilibrios. Tenemos problemes mundiales que nun fuimos quien a tratar como sería de razón, entellos el cambéu climáticu o la fame nel mundiu, y agora súmasenos otra dubia. La fortaleza de Rusia vien de la so capacidá destructiva. Con los mis respetos, por más que se quiera plantegar, pa “Occidente” nun dexaba de ser daqué marxinal, con quien podía colaborase dacuando o mirar pa otru llau. Y la política rusa tuvo casi al par de la ruleta a la que y da nome, mesmu cuando finalmente roblaron el Protocolo de Kiotu, al serviciu del meyor postor (afortunadamente). Fálase muncho de la OTAN, y pa mi que taba bien murnia y esto vino a despertar vieyos fantasmes. Y, lu que ye pior, va tener consecuencies na vida de cada día de miles de millones de persones, non solo de los europeos a ún y otru llau de los Urales. Pe lu proto, daqué que taba fuera bolos, como l’integración d’Ucrania na Unión Europea, parez que va tomar forma, al rau los acontecimientos.

N'esti marabayu, la Federación Rusa ta a un pasu de quedar fuera del Conseyu d’Europa, esa organización na que participen casi que mediu centenar d’estaos, mesmu paneuropeos.

EQUÍ ¿QUIÉN MANDA?

La Sociedá de Naciones nun valió de muncho, la Organización de Naciones Uníes ta presa de los vetos y fálta-y operatividá. Per otru llau, los Estaos Uníos garraren puxu na IIGM, mesmu la URSS, y tal parez que l’esbarrumbe comunista dexó’l terrén pa los norteamericanos. Pero’l xigante chinu, como lu nomara Napoleón, ta bien despiertu y son munchos los problemes nos que lu que los economistes llamamos “rexón de beneficiu” ye’l planeta enteru. Esu desixe que les soluciones tengan que tomase por dalguién que alcance a poneles en práutica en tol mundiu, y nun se ve forma de que los menguaos sistemes qu’operaren internacionalmente seyan quien a poder averase, siquiera, a esa realidá complexa.

Capítulu aparte merez China, la so guerra comercial colos Estaos Uníos, les sos inversiones en tol mundiu (tamién n’Ucrania), el fechu de que importara siempres munchu material militar de Rusia y la so escomanada capacidá de produición condicionen un conflictu del que simulen tar apartaos. Poro, China nun fala de guerra, manda pa Ucrania material humanitario, sin más. Y non refuga les actuaciones impulsaes por Putin. Al par, Yang Jiechi fala en Roma con Jake Sullivan, n’una de les poques reuniones que tuvieren estos años China y Estaos Unios, mentantu Rusia pide armamentu, pensando, de xuru, que pudiera se-yos mui buenu poder emplegar el que y vendieren a China estos años.

Si difícil ye pensar en quién pueda poner orde, el repasu a les posibles salíes a la crisis amuesa bien poques oportunidaes, son toes bien poco amañoses. Nun ye fácil topar un res de daqué que pueda valir pa que Rusia pueda salir del infiernu nel que se metió, al par que metió a Ucrania y al mundo enteru, pero a la Unión Europea mui especialmente. La paz ye lo único claro que tien de llograse, cuanto primero meyor, pero el día siguiente va ser el d’empezar a recomponer lo que se rompió, que ye muncho. Rompióse un llargu tiempu de paz n’Europa, dende les guerres de Yugoslavia, valtóse la contención nel gastu armamentísticu y habrá que ver si’l coste de nun entendese tien una solombra que nun haya quien la seya quitar. Cuanto primero s’entienda tou estu, más posible será minimizar el costu, y la guerra informativa va tentar de que los que siempres sufren les consecuencies dean créditu a interpretaciones kafkianes. El control de los medios va ser fuerte, pero ye complicáu cortar les informaciones. Tamos a más de tres décades de la caída de la URSS y ya entonces xugó un papel importante la visión de lo qu’había fuera, na parte más occidental d’Europa. Aislase nun ye posible a día de güei, esa ye, quiciabes, la esperanza de que se ponga fin a tanto sinsentíu.

LO QUE NUN PUEDE SER

Y nun puedo roblar esti escritu sin volver decatame diciendo que podremos tener problemes que compliquen la vida de la xente d’Asturies y de la UE, pero lo capital ye que más de cuarenta millones de persones tán en mediu les bombes y los tanques, que miles de soldaos que nada quieren la guerra tan metíos de llenu en batalles imposibles de ganar y, lo que ye de preocupar, que les decisiones tán en manes de xente como Putin, o hai pocu de Trump, o de dalgún gobernante danubianu. Nun pue ser la guerra, ye cosa de sofitar cuanto podamos a los que  tán sufriéndola y dar pasu a un escenariu nel que vuelva ponese la paz que nun tenemos como oxetivu fundamental de la sociedá europea. El casu ye cómo topar la forma de dir onde casi que toos queremos y tornar ceo cualisquier posibilidá de mayor enguedeyu.

---

---

---