Nes cais de los nuestros pueblos y ciudaes homenaxeóse y homenaxéase la figura de personaxes públicos que xeneralmente formaron y formen parte de la cultura del nuestru país. Nos cuarenta años de la dictadura franquista yera un fechu lóxicu que la mayoría de los nomes d’eses cais, sacante vírxenes y santes, fueren d’homes -los homes escoyíen a los homes- porque les muyeres quedaben relegaes a la familia y los cuidaos de la casa y la familia. Hai qu’alcordase de qu’en 1944 reinstauróse’l Códigu Civil de 1888, polo que desapaeció la capacidá decisora de la muyer dientro de la familia algamada na Segunda República. La muyer debía-y obediencia al home, que se convertía nel representante llegal de la esposa, que perdía cualesquier capacidá d'acción ensin el consentimientu del home.
Per otru llau, la educación preparaba mui bien a les neñes pal oficiu d'ama de casa. La Sección Femenina, una organización de mases que tutelaba emocionalmente a les muyeres como si fueren neñes que necesitaren d’una figura masculina, inculcaba na población que la única xera de la muyer nel llabor de la patria yera ser una madre sacrificada y una esposa obediente, que tenía’l so llugar na casa, non nes cais, pa nun cayer «na vanidá d’enseñase nes places» porque carecía del «don de la palabra» dalgo que tenía que «agradecer a Dios». Nun chocó que depués del golpe d'Estáu de 1936, la victoria del exércitu franquista tres años depués y la dictadura, a lo llargo de munchos años, los nomes femeninos de les casi «brillasen pola so ausencia», anque en realidá les muyeres nun destacaben porque’l réxime pretendía manteneles na escuridá. Malpenes hebo un curtiu grupu privilexiáu de muyeres con oportunidá de participar na política, l’arte, la cultura o la ciencia, polo que la desigualdá nos nomes de les cais yera resultáu de la desigualdá histórica que silenciaba a les muyeres.
De toles maneres, esta inxusta situación vien arrastrándose práuticamente hasta l’actualidá y, como sabemos mui bien, «lo que nun se noma nun existe». Depués de que llegare la democracia a España en 1977 pensábase que tolos partíos políticos tendríen voluntá política pa visibilizar a les muyeres y anque nadie esperaba que se diere darréu, sí que polo menos la situación camudaría a partir del artículu 11 de la Llei Orgánica 3/2007 pa la Igualdá de Muyeres y Homes, yá que les corporaciones municipales siguiríen los encamientos pa qu’adoptaren d’una vegada les «midíes específiques en favor de les muyeres pa correxir situaciones clares de desigualdá de fechu respeuto de los homes». De toles formes, les dereches nun tuvieron, nin tán, pol llabor del cambéu, asina que nun tien que chocanos qu’un estudiu, Ciudaes con xéneru: estudiu del sesgu de xéneru urbanu al traviés de los nomes de les cais, alvierta de que les desigualdaes reales y el machismu del caleyeru entá queda mui patente: namás un 12,1% de les cais llevaben nome de muyer en 2020, dalgo que «nin ye proporcionao nin ye realista».
La investigadora Dolores Gutiérrez Mora, coautora del estudiu, diz que l’aumentu «de 2,5 puntos na proporción de cais femenines nos postreros 20 años nun supón en concencia una meyora significativa en términos d'igualdá; sicasí, hai que dicir que ye lo esperable». Ensin dulda necesítase camudar esa desidia que permanez nes cais y aveníes nueves. Ente 2001 y 2020 namás el 18,4% de les nueves víes, y aquelles a les que-y camudaron el nome, llevaba el nome d’una muyer, lo que quier dicir que’l sesgu caltiénse.
Nes elecciones municipales de mayu de 2015 fueron munchos los ayuntamientos en coaliciones de les izquierdes qu’afitaron midíes pa desaniciar los nomes de cais franquistes cumpliendo la Llei de Memoria Democrática y aprovechar asina pa dedicar más cais a les muyeres. Hebo rexidores como Manuela Carmena que rebautizó les más de 150 calles franquistes de Madrid y, nesi mesmu sen, la corporación d’Uviéu col socialista Wenceslao López como alcalde, retiró les plaques venceyaes al réxime. La corporación marcóse’l retu de «llograr nun tiempu razonable, y na midida de lo posible, la representación equilibrada d'homes y muyeres nel caleyeru municipal d’Uviéu», pero la llegada del PP col so alcalde, el señor Canteli, trestocó esa iniciativa. Esa denominación anulóse y la corporación rexida pol alcuerdu PP y C’s decidió dar un tercer nome a les víes afectaes, saliendo «perdiendo» nel cambéu once muyeres, lo qu'indignó al Conseyu d'Igualdá de la ciudá, a UXT, al Conseyu d'Igualdá del Principáu y a numberoses asociaciones. Pesie a too, l’alcalde popular nun rectifica. La conceyala socialista Marisa Ponga (PSOE) califica d’un «auténticu despreciu» la retirada del caleyeru a les muyeres, que podría considerase «violencia machista institucional».
Dende llueu, nin les muyeres d’Uvieu nin los homes tendríemos que permitir que menos del 3% de les cais de la ciudá tengan nome de muyer, tal como denuncia'l PSOE. Ye necesario lluchar con toles armes democrátiques pa que les ofienses d’un alcalde «sectariu» y «machista» suprima once nomes de muyeres del caleyeru amparándose en «falsedaes». Invisibilizar a les muyeres nun ye propio d’ayuntamientos democráticos. Estes falcatrúes de les dereches tán faciéndose n’otros ayuntamientos, asina’l PP y C’s burllen la Llei de Memoria en Zaragoza pa caltener el nome del caderalgu que dirixó la depuración fascista nes universidaes y a dellos alcaldes y conceyales de la dictadura mientres-y niega la presencia a delles científiques, igual que n’Uviéu, onde vuelven al mapa los nomes de dellos militares que tuvieron un papel destacáu na represión de posguerra, siendo dalgunos d’estos personaxes represores grandes almiradores del nazismu.
Nun hai dulda de que l’actual alcalde d’Uviéu y los conceyales del PP y C’s piensen lo mesmo que’l portavoz de Vox del Ayuntamientu de Móstoles: «Nosotros nun odiamos a les muyeres. Nel nuestru partíu hai enforma muyeres de gran valir, casi tanto como’l de los homes». Ye indigno y anacrónico que les dereches d’Uviéu y de toa España entá sigan cola mesma concepción femenina que na época de la dictadura franquista, qu’a lo llargo de más de 40 años relegó a les muyeres al ostracismu. ¿Vamos ser capaces de permitir qu’esta tradición machista y franquista siga asitiada un día más nel ayuntamientu de la capital d’Asturies? Les Maestres de la República, Concepción Arenal, Matilde García del Real, Gloria Fuertes, Les Trece Roses, María Xosefa Canellada, Flora Tristán, Aurora de Albornoz, Sara Suárez Solís y Amparo Pedregal merecen el so nome nes nuestres cais y d’ello que nun tendríemos que permitir un pasu atrás nel camín de la igualdá. Xugámonos muncho: un retrocesu na visualización de la muyer que nun se vía dende 1977 cola caída del réxime franquista.Tanto les muyeres como los homes tenemos que presionar pa que les cais seyan un reflexu de la tresformación social de les muyeres. Nun podemos permitir qu’una corporación machista, autoritaria y clasista faga de menos y dexe na escuridá a la metá de la población otra vuelta más.