Güei va diez años, un 29 d’ochobre de 2011, Vítor Suárez y yo, dempués d’un intercambiu d’artículos reflexonando sobre la situación de la reivindicación llingüística y dellos meses de conversaciones con más xente lleguemos a la conclusión de que facía falta una organización de reivindicación nueva, adaptada a los tiempos que vivíemos. Xuntemos a un grupín de persones qu’amosaron interés. Xente mui variao, la mayor parte mocedá, pero tamién muyeres y homes d’otres xeneraciones, unos con esperiencia na reinvidicación, dellos hestóricos, y otros nuevos nesti ámbitu, pa poner les bases de lo que diba ser Iniciativa pol Asturianu nun conceyu fundacional.
Partíemos d’un analís asemeyáu, facía falta un revulsivu nel movimientu de reivindicación llingüística, desgastáu de trabayu y desilusiones, pero precisábemos sobre manera un cambiu d’enfoque nesi llabor reivindicativu. Per un llau teníenos falta de buscar otru mensaxe que mandar a la sociedá, más amable, más inclusivu, más didácticu… Per otru, yera necesario nun se centrar namás na oficialidá, sinón qu’al mesmu tiempu que se reivindicaba esi estatus teníemos de consiguir otros llogros pa la normalización del idioma y aplaudir y premiar a quien lo fixera, pa qu’esos pasos s’espardieren per otros llugares. Nun podía ser l’idioma namás cuestión de conflictu, anque esistiera esi conflictu, y siguía (y sigue) siendo preciso señalalu cuando esista.
Esti camín entamáu en 2011 permitió que se sumaren a esta reivindicación persones d’ámbitos sociales y políticos qu’hasta entós nun se sintieren cómodos nesti espaciu, y col tiempu, abrir víes de diálogu nunca esploraes que permitieron aportar el nuesu sofitu en fechos clave pa que la situación actual seya definitivamente esperanzadora.
Nestos años consiguimos afalar a munchos pequeños llogros nos ámbitos de la toponimia, la normalización y la presencia social del idioma, que xuntos son anguaño parte d’una realidá más optimista y de mayor visibilidá pal idioma.
Foi tamién clave’l cambiu na percepción que la sociedá tien del movimientu de reivindicación llingüísticu. Diez años más tarde apaecemos como un colectivu más dialogante, amable, d’espíritu constructivu y nel que cabe xente de tolos ámbitos sociales y políticos, somos más tresversales que nunca. Y eso ye clave pa que llograremos ser mayoritarios na representación política de les idees que defendemos.
Dende Iniciativa pol Asturianu fiximos denuncies y felicitaciones, aconceyemos con instituciones y colectivos, entamemos cursos d’asturianu y gallego-asturianu, punximos en marcha concursos, roblemos convenios con empreses y creemos l’espaciu na Feria Muestres, que se convirtió nun llugar de pasu y reflexón pa tola clas política asturiana, celebremos los Seminarios de la Oficialidá, nos que planteguemos con seriedá la cuestión, tuvimos nos medios de forma intensa con mesanxes didácticos, y tantes y tantes xeres que siempres prestaría que fueren más, pero de les que podemos tar arguyosos, non porque les fixere Iniciativa pol Asturianu, que nun ye más qu’una ferramienta, sinón porque fueron útiles pal idioma y aportaron a la solución de los problemes de reconocencia llegal y social del asturianu y el gallego-asturianu.
Diez años más tarde, equí tamos, con una situación mui distinta a la d’entós. Cuando nos plantegamos oxetivos en 2011, teníemos claro qu’esti yera un trabayu pa una década, y xusto agora ta discutiéndose sobre les condiciones de la oficialidá, y ta más cerca que nunca algamar esa importante ferramienta llegal.
Pero habrá que siguir trabayando. Dende 2019 ta al frente d’Iniciativa pol Asturianu’l periodista Iván Llera, que ta faciendo un escelente trabayu dirixendo esta organización que suma a más de mediu millar d’asociaes y asociaos, y que ye güei un referente ineludible na cuestión llingüística. Y préstame que lo seya, non porque quiera nenguna reconocencia pa Iniciativa pol Asturianu, sinón porque pienso que’l so llabor sigue siendo positivu y útil pal idioma.
Agora toca, amás de collaborar en que’l procesu de reforma estatutariu salga bien, siguir construyendo na sociedá un clima favoratible al idioma. Porque nos diez años vinientes hai que consiguir desendolcar la oficialidá, lo que va ser posible namás cola complicidá de los representantes públicos y tamién y especialmente, de la sociedá asturiana, pa que fale o deprenda, pa que tresmita l’idioma los fíos y los ñetos, pa que sofiten les polítiques de normalización. Los vinientes diez años han ser los del comienzu de la recuperación.
Queda munchu camín, pero güei podemos mirar atrás con satisfacción, porque l’aportación d’Iniciativa pol Asturianu foi inclusiva y constructiva, foi útil, y eso ye lo meyor que se pue dicir d’una organización reivindicativa. Gracies a toles persones que lo fixeron posible nestos años. Siguimos tomando la iniciativa pol asturianu.