Según Ignacio Blanco, «nun representa a Asturies» y a lo llargo de los sos 40 años d'historia «empeoró la situación demográfica y la economía» rexonal
14 sep 2021 . Actualizado a las 18:02 h.Vox reclamó a PP, Ciudadanos y Foru que nun asistan a la xunta convocada esti xueves pol presidente Adrián Barbón pa principiar el procesu de reforma del Estatutu d'Autonomía. Un testu que según el portavoz de Vox, Ignacio Blanco, «nun representa a Asturies» y que a lo llargo de los sos 40 años d'historia «empeoró la situación demográfica y la economía» rexonal.
Blanco anunció esti martes n'Uviéu que mandó a les 8.00 hores d'esta mañana una carta a los portavoces d'eses trés formaciones pa que nun participen nel debate impulsáu pol Gobiernu asturianu. La invitación de Vox propón trés posibilidaes pal alcuentru: esti mediudía pa comer, a les 17.00 hores d'esti martes o mañana, enantes de la Xunta de Voceres.
Según Blanco, la xunta del xueves en Presidencia convocada por Barbón ye «una coartada» pa «imponer» una reforma que, según el diputáu, va recoyer «lo que-y dea la gana a Barbón», como ye más autogobiernu y la oficialidá del asturianu y del gallego-asturianu. Cuestiones «que s'averen al nacionalismu escluyente d'otros sitios» de cara a convertir a Barbón «nel Fraga socialista asturianu nuevu».
Nesi sentíu, pa Vox, cola reforma del Estatutu, el presidente «pretende identificar Asturies col Estatutu y l'Estatutu con Barbón» y asina «dibuxar un cuadru onde'l protagonista va ser la oficialidá», polo que llamó a PP, Ciudadanos y Foru a nun participar nel debate.
El diputáu de la formación de Santiago Abascal, que consideró «una falta de respetu» abrir la negociación sobre la reforma ensin plantear enantes un debate sobre la so necesidá, indicó qu'Asturies nun precisa más autogobiernu porque Barbón «na pandemia fixo lo que quixo, hasta enciarranos en casa». Amás, cargó contra la oficialidá, pa la que según él «nun hai demanda», informa Europa Press