La «xuntanza trasatlántica» avanza la llegada de la esposición «Emigrantes invisibles» a Xixón
AGORA
Ampliu programa d'actividaes alredor de la esposición itinerante que va llegar na seronda al CCAI
14 sep 2021 . Actualizado a las 09:58 h.Por cuenta de la llegada a Xixón na seronda de la esposición itinerante Emigrantes invisibles. Españoles en EE.UU. (1868 - 1945), la Fundación Consejo España -EE.UU y el Muséu del Pueblu d’Asturies, en collaboración cola Fundación Municipal de Cultura, Educación y Universidá Popular-, van celebrar el próximu 25 de setiembre la Xuntanza trasatlántica: archivos domésticos y piquiniqui 2.0, una xornada festiva de recuperación del legáu históricu y documental de los miles d'asturianos qu'a finales del sieglu XIX y principios del XX cruciaron l'Atlánticu rumbu «al Norte».
Les persones asistentes van tener la oportunidá de compartir les sos fotografíes, alcordances y hestories familiares colos comisarios de la muestra, James D. Fernández y Luis Argeo. El llugar escoyíu va ser el Tendayu del Muséu del Pueblu d’Asturies, onde se van instalar escáneres pa poder dixitalizar los materiales recuperaos, que van pasar a formar parte del inmensu archivu curiáu polos comisarios.
Amás, una selección de los materiales dixitalizaos va tener el so espaciu na esposición mientres la so estancia en Xixón. La xornada va rematar cola celebración d'un piquiniqui -términu qu'utilizaba la comunidá española n'Estaos Xuníos pa referise a los picnics- nel prau, amenizáu con música y xuegos infantiles. Esta xuntanza, que pretende remembrar los alcuentros que s'entamaben col fin de caltener los raigaños españoles al traviés de la gastronomía, la música popular o los bailles, va ser respondida de forma simultánea al otru llau del Atlánticu, en concretu, nel Centru Español y el Centru Asturianu de Tampa (Florida), en La Nacional de Nueva York y na Sociedá Española de San Luis (Misuri), colos que se va conectar en directo dende Xixón.
El pasu del tiempu y l'asimilación na cultura estauxunidense fueron adulces debilitando los vínculos ente les siguientes xeneraciones y los llugares de procedencia de los emigrantes. Gracies a esta remembranza, estos llazos repónense güei un nuevu aliendu.
El programa d'actividaes nel Muséu va completase con charres sobre la importancia de caltener los archivos domésticos impartíos por persones y asociaciones vinculaes a la emigración asturiana, como Alfonso García, responsable del achivu históricu de la compañía Asturiana de Cinc n'Arnáu; la historiadora Tatús Gil, de l'Asociación Navegantes, en Colombres; la investigadora Yolanda Cerra Bada, quien va compartir la so esperiencia na preservación d'un legáu familiar; Sonia Gayo, responsable del archivu del Muséu del Pueblu d'Asturies, o Chema Menéndez, ñetu de Jaime Menéndez El Chatu, l'asturianu que se convirtió nel primer redactor español de The New York Times. Amás, el Tendayu va acoyer una obra de teatru amateur al cargu de la asociación cultural Fumañeda Santolaya.
Esti eventu va dar el pistoletazu de salida a una amplia programación d'actividaes culturales entamaes al rodiu de la esposición Emigrantes invisibles, que va poder visitase nel Centru de Cultura Antiguu Institutu (CCAI) dende'l 18 de payares de 2021 hasta'l 6 de febreru de 2022. Tres el so pasu pel Centru de Cultura Contemporanea Condeduque de Madrid, onde recibió a más de 21.000 visitantes, la muestra abre agora una nueva etapa n'Asturies y vuelve demostrar que les hestories escondíes nos álbumes fotográficos y lates de galletes atesoren un enorme valor históricu y emocional que cuerre'l riesgu de desapaecer y merecen ser calteníes.