La discriminación lllingüística ye'l procesu de discriminación qu'una persona o grupu social pue carecer pola mor de la llingua na que s'espresa. Sigue tratándose de manera desigual, o seya, discriminando l'asturianu respeuto al castellanu. Y eso dempues d'una decena de tesis doctorales na llingua llariega.
Iniciativa pol Asturianu denunció esti fechu, unu más y solicitó la modificación del Reglamentu que permita la presentación de tesis y trabayos na llingua asturiana. De recién, n'ochobre de 2020 tocó-y a un estudiante del grau d'Hestoria nel so Trabayu de Fin de Grau (TFG). Nesti casu col sofitu de los docentes a l'asturianu. Pero col refugu de l'alministración, na memoria de verificación.
Ello ye contrario a los Estatutos de la Universidá d'Uviéu, que dicen que «naide podrá ser discrimináu pol usu del asturianu». Asina como la llei d'Usu y Promoción del Asturianu de 1998 que dexa a los ciudadanos dirixise llibremente a l'alministración usando l'asturianu, asina como la propia normativa de presentación d'estos trabayos. Énte dellos casos asocedíos d'este triba, la organización de defensa del idioma afita que la manera definitiva pa finar con esti problema ye la declaración d'oficialidá nel Estatutu d'Autonomía, que permitirá el llibre usu de la llingua pol usuariu.
Iniciativa pol Asturianu pide garantía pa usar l'asturianu na presentación del TFG y que la institución universitaria camude'l Reglamentu pa que puean facese tesis y trabayos de tou tipu n'asturianu igual que se faen en castellanu. El caberu casu nesi sen acaeció en xineru na mesma Facultá de Filosofía y Lletres, onde s'aprobó una tesis doctoral n'asturianu, pero obligando a presentar les conclusiones en castellanu.
Otru incidente más de recién foi'l d'a lo menos trés estudiantes suspendíos na evaluación final por presentar trabayos n'asturianu, como veníen faciendo tol cursu, nun Títulu propiu: Especialista n'Asturies. Espaciu, Patrimoniu, Cultura. Fortunosamente, el direutor del Títulu ufrióse a correxir los trabayos de mou voluntariu na segunda convocatoria. Anque'l compromisu personal nun pue ser una solución permanente pa la defesna de los drechos de los asturfalantes.
El rectoráu fizo pola normalización del idioma asturianu na Universidá pero pervese que los esfuercios que se faen agora nun son enforma pa torgar la discriminación llingüística entá viva na institución cimera del conocimientu nel país.
Un mal exemplu pa la sociedá asturiana na que s'inxerta.
La única igua pa finar cola represión llingüística nel sieglu XXI ye la oficialidá, como afita l'asociación lniciativa pol Asturianu, cola que naide tien que ser discrimináu pol idioma nel que s'esprese. D'esta miente, l'aniciu de la Reforma del Estatutu anunciada pa setiembre ye una bona noticia. Sobremanera agora qu'hai una mayoría parllamentaria que tá pola oficialidá.
Que'l nuevu cursu fine llegalmente cola discriminación y abra'l camín pa la llibertá de llingües nel país.