Nenguna palabra naz a lo fato sinón con un sentíu. Con un comportamientu mui asemeyáu a les persones, xurde por una razón, dacuando ye dalgo mui obvio, pero n'otros casos ye necesario descubrilo. El casu ye que les palabres xeneren cantidá de caminos pelos que podemos caleyar. Eso sábelo bien el expresidente Rajoy, un home dotáu d’una particular filosofía popular mui castiza; con toa seguranza, van quedar grabaes na historia del nuestru país les sos sabies palabres: «Un vasu ye un vasu y un platu ye un platu». Nadie enxamás va poder rebatí-ylo porque ye poseedor de la razón. Pues hai daquién que sigue la filosofía de Rajoy al que tampoco van poder rebatir les sos palabres: falo de Núñez Feijóo qu’enmendó otres palabres, les de Casado. Feijóo diz que «La Guerra Civil foi un golpe d'Estáu y un desastre pal nuestru país». Debe ser que ye tamién gallegu y comparte la filosofía del platu y el vasu de Rajoy. Por esti motivu, contradiz al so «amáu» líder cuando equipara al bandu subleváu col republicanu. Feijo tuvo que recorda-y a Casado que Franco llegó al poder al traviés d’un golpe d'Estáu, ye dicir, una actuación violenta y rápida, xeneralmente per parte de fuerces militares o rebeldes, pela qu'un grupu determináu, nesti casu l’exércitu d’África baxo les órdenes de Franco, intenta apoderase, o apodérase, d’un Estáu. Franco pulverizó ensin piedá un gobiernu democráticu. Asina que si «Un vasu ye un vasu y un platu ye un platu», el golpe d’Estáu llevó a España a una dictadura, ye dicir, a un réxime políticu que, por mor de la violencia, concentró tol poder nuna persona, el xeneralísimu Francisco Franco que reprimió ensin nengún miramientu los derechos y les llibertaes individuales. La conclusión de Feijóo foi la necesidá d'estrayer llecciones de la hestoria: «Lo meyor que podemos facer ye deprender de lo que ficieron de forma inadecuada los nuesos bisagüelos». Supongo que se refier a los que promovieron el golpe d’Estáu, anque ye verdá que na práutica falló nesi cometíu yá que nun siguió manteniendo les polítiques de memoria histórica promovíes pol bipartitu de Partíu Socialista y el BNG.
Ello ye que xustificar cualesquier golpe d’Estáu, seya’l que pasó n’España o non, ye mui peligroso. Roberto Fernández, Premiu Nacional d'Hestoria 2015, diz que solo hai una llei llexítima y ye la que se constrúi en democracia. Esto ye, nun hubo llexitimidá porque la dictadura acabó coles lleis llexítimamente instauraes pola democracia sofitada na voluntá del pueblu, non na del arbitriu d'un dictador. Per otru llau, negar la esistencia de lleis mientres la II República ye mentir. Aquelles lleis y el so Gobiernu escoyíu llibremente fueron asaltaos poles armes, lo que llevó a la Guerra Civil. Dalgo oxetivamente verdadero, anque Casado ponlo en dulda. Amás, el líder del PP xustifica que quien sía puea alzase contra gobiernos democráticos. Por muncho qu’a la derecha nun-y guste’l gobiernu de la Segunda Republica ta obligáu a reconocer que foi tan democráticu como l’actual. Esta «tibieza» nestos temes paez indicar que con tal de defender lo indefendible, la derecha española ye capaz de cayer na inmoralidá de negar un réxime dictatorial como’l que carcomió a España a lo llargo de 40 años. Nun podemos escaecenos de que fueron munchos los crímenes del franquismu que quedaron impunes. Lo malo ye que na actualidá existe un revisionismu históricu que niega o relativiza esos crímenes de la dictadura y que dellos historiadores, como Hugh Thomas, caltienen una equidistancia respeuto de la responsabilidád de los dos bandos. Estos actos criminales desataos entamaron coles tropes de Queipo de Llano y Franco nos primeros momentos de la guerra, pero nada en comparanza colo qu’asocedió depués: mediu millón de muertos, igual númberu d’exiliaos, más de 120.000 desapaiciones, 10.000 españoles deportaos nos campos d’esterminiu nazi, a los que Franco dexó morrer ensin mover un deu, el trabayu esclavo de milenta presos, la represión sobre les muyeres, los casos de los robos de rapacinos, la incautación de bienes de republicanos y un llargu etcétera. A pesar d’ello, el problema foi que, baxo una idea malentendida de reconciliación y concordia, foi estendiéndose un velu mui tupiu sobre unu de los periodos más negros de la nuestra hestoria. Esta política de desmemoria entá ta trescalando los conteníos curriculares de la nuestra enseñanza na actualidá.
En realidá nun sé por qué nos sorprendemos de l’actitúd del PP frente a estos temes: Pablo Casado yá dixera en 2008 que «Los d’izquierdes son unos carcas, tol día cola fosa de nun sé quién». Nesa llinia ta tamién José María Aznar: «Nun removamos les tumbes ni nos tiremos los güesos a la cabeza»; y Esther Muñoz, exsenadora del PP falando de les perres destinaes pa la Memoria Histórica, atrevióse a dicir: «15 millones pa qu’ustedes desentierren unos güesos». Nesi mesmu sen Rafael Hernando, cuando yera portavoz del grupu parllamentariu popular, faló de que «dalgunos alcordáronse de so pá cuando había subvenciones pa topalu». Y José Joaquín Peñarrubia, exsenador del PP por Murcia, recomendó que «nun dieren más la murga […] porque yá nun había más foses que descubrir».
Señor Casado, usté que siempre anda tan sollerte coles dictadures foriates,vuélvese miope respeuto a la dictadura que mayó España 40 años. A ver, señor Casado, repita conmigo: «N’España hubo una dictadura a lo llargo de 40 años». Nun pasa nada por dicilo. En realidá nun ye que pase nada, ye obligao reconocelo.Tamién ye obligao reconocer la necesidá d’una norma que cumpla colos cuatro principios fundamentales que postulen los organismos internacionales en materia de memoria histórica: verdá, xusticia, reparación y deber de memoria. Permítame suxeri-y que dexe de siguir la estela de VOX que pretende derogar la nueva llei, tachándola d’inconstitucional y por ser frutu d’un «aquelarre antifranquista». Y ye qu’a la ultraderecha paez-y que «naide va poder borrar la enorme trescendencia de Francisco Franco y la so dómina, tanto polo que torgó, como polos sos llogros». Y van más allá, falen de qu’hai una versión distinta de la historia; ye dicir, la d’ellos, como herederos del franquismu y tamién del trumpismu n’esencia pura.
Mire, señor Casado, ¿cómo nun espatuxó cuando sintió al entós alcalde del PP, Manuel González Capón, dicir que «los condenaos a muerte fue porque lo merecíen?» ¿Merecía’l rector Leopoldo Alas que lu fusilaren en 1937? ¿Ye un delitu ser íntegru, decente, cultu, sensatu y comprometíu? A lo meyor a usté paez-y suficiente motivu’l so compromisu republicanu. Y como él, el rexime maltrató y asesinó a tantos españoles con más o menos cultura, con más o menos integridá. Y la sociedá callaba. Y naide retrucaba, nun denunciaben les sos muertes. Les palabres yeren incapaces de xenerar cantidá de caminos nos que podíen caleyar. Pues yá pasó’l tiempu del silenciu, de la impunidá y del ostracismu. Llegó’l momentu de poner a les víctimes nel so sitiu, de glayar que fueron mui inxustes les violaciones de los derechos humanos y declarar nules las sentencies de los tribunales de la dómina, entre otres acciones.
Mire, señor Casado, permítame face-y la última suxerencia: usté que tan avezáu ta a facer másteres a les carreres ¿por qué nun s’anima a facer unu sobre la memoria democrática? Ellí va sentir munches palabres sobre qu’un vasu ye un vasu y qu’una dictadura ye una dictadura, ayudarálu a comprender el sufrimientu que causó na sociedá española y sofitará convencíu la nueva llei de Memoria Democrática, una llei necesaria que nos fai meyores como país.