El Centru d'Arte y Esposiciones acueye la esposición compuesta por un centenar d'obres del grupu más influyente nel desenvolvimientu del arte de vanguardia n'España nel sieglu XX
09 jul 2021 . Actualizado a las 14:05 h.El Centru d'Arte y Esposiciones d'Avilés acueye dende esti miércoles la esposición «Antes de, en y después de El Paso», compuesta por un centenar d'obres d'autores integrantes d'El Paso, el grupu más influyente nel desenvolvimientu del arte de vanguardia n'España nel sieglu XX, escoyíes pol críticu Luis Feás Costiella.
Ente'l centenar de pieces, pertenecientes a la Colección Fernán-Gómez Arte Contemporaneu, hai obres de pintores como Antonio Saura o Juana Francés, y d'escultores como Pablo Serrano o Martín Chirino, informó'l Conceyu.
L'amuesa, que podrá vese hasta'l próximu 28 d'agostu, ta compuesta poles pieces que fueron adquiriendo a lo llargo de los años Fernando Fernán-Gómez (fíu del célebre actor) y la so muyer, nel so enfotu por consiguir una colección de tolos artistes que compunxeron El Paso, ensin aparase nel purismu de les feches d'execución.
Nella tienen cabida obres realizaes polos artistes del grupu en cualquier momentu de la so actividá creadora y non solamente nel periodu 1957-1960, mientres el que tuvo xuníu.
El Paso fundáronlu en 1957 los pintores Antonio Saura, Luis Feito, Manolo Millares, Antonio Suárez, Manuel Rivera, Rafael Canogar y Juana Francés, l'escultor Pablo Serrano y los críticos de arte José Ayllón y Manolo Conde.
Más tarde, en 1958, van incorporase l'escultor Martín Chirino y el pintor Manuel Viola, hasta la so disolución en 1960.
La mayor parte de les pieces que componen la colección fueron adquiríes a los mesmos artistes nos sos estudios y a lo llargo de los más de cuarenta años d'actividá de Fernando Fernán-Gómez nel so oficiu de galerista y marchante d'arte.
El coleccionista amosó'l so interés en que la esposición llegara al CMAE, yá que la ciudá ye «bien importante» pa él.
El so bisagüelu, el güelu maternu de so padre, l'actor Fernando Fernán-Gómez, yera natural d'Avilés, anque se treslladó a Madrid como representante d'un negociu familiar.