Refléxase un llixeru retrocesu interxeneracional nel so usu, anque l'eonaviegu sigue siendo la llingua materna mayoritaria na zona
26 jun 2021 . Actualizado a las 10:22 h.Trés de cada cuatro ciudadanos de la fastera del Navia-Eo son falantes de la llingua eonaviega, según recueyen los resultaos de la III encuesta sociollingüística que llevó a cabu nesta comarca l'Academia de la Llingua Asturiana que considera que se ta dando un claru procesu de normalización y que se remana con más maña de lo que se fai col asturianu nel restu del Principáu.
L'organizador del estudiu y director del EuskoBarómetro, Francisco José Llera, evidénciase al traviés de los datos recoyíos que la llingua vernácula ta viviendo un claru procesu de recuperación, anque señaló que s'atopen clarescuros en dalgún qu'otru aspeutu», como'l pesimismu que los mesmos falantes amuesen respectu al futuru d'esta llingua.
Tamién se reflexa qu'hai un llixeru retrocesu interxeneracional nel so usu, anque l'eonaviegu sigue siendo la llingua materna mayoritaria na zona.
Mientres la presentación del estudiu, el presidente de l'Academia de la Llingua Asturiana, Xosé Antón González, destacó la importancia de los resultaos de les encuestes nun contestu de pandemia, cuando los habitantes de la zona podríen tar influyíos poles necesidaes económiques y sociales qu'ésta provocó más qu'en cuestiones culturales.
El restu de los datos van conocese a lo llargo de 2021 y van ser espublizaos al traviés de l'Academia de la Llingua Asturiana.
Una de les claves que pruebren l'afitamientu y la progresiva normalización de la 'fala' ye la percepción positiva de la so fala, una y bones el 87% refuga la idea de que falar en castellán ye falar correctamente y que facelo na so llingua vernácula ye falar mal.
Alredor de la metá de les respuestes mostráronse derrotistes frente al usu nel futuru de la so llingua, mientres que'l 60 % piensa que nun esiste peligru de desapaición, y un 86% cree que se debe estudiar nes escueles, anque la mayoría opina que tien de ser una asignatura optativa.
Más del 75% de los encuestaos creen tamién que l'eonaviegu tien de ser consideráu una llingua y llograr un estatus similar al valencianu, gallegu o balear, y una mayoría declárase partidaria de la so oficialidá, xunto al asturianu.
Tocantes a les polítiques llingüístiques más de trés cuartos de la población consideraron que les instituciones públiques tienen d'implicase na protección de la llingua y trés de cada diez habitantes cuntaron que el Gobiernu Asturianu nun fai nada por promocionar la fala eonaviega.
La encuesta realizóse al traviés de 400 entrevistes telefóniques a la población mayor de 16 años nos 18 conceyos de la área xeográfica del Navia-Eo.