Ayeri en Colón, Pablo Casado ya Inés Arrimadas volvieron a siguir a los que nieguen na cai, nes urnes y nos tribunales la violencia machista y la defensa de los derechos de les muyeres. Si dende llueu Pablo Casado quier ser el líder d’un partíu demócrata qu’espera gobernar esti país habría salir a la cai a denunciar a los que maten a les muyeres, y a los sos fíos y, como non, denunciar tamién a los partíos d’ultraderecha que traten de silenciar la voz de les muyeres. Pero si, tal como diz Abascal, ye la «derechita cobarde», ¿sedrá capaz a atrevese a llevantar la voz pola «dignidá de les muyeres y los neños d’estes muyeres maltrataes»? Dende llueu paez que non porque callen cuando sienten a Ortega Smith y los sos collacios dicir que la violencia machista ye una «gran mentira».
L’otru día lleía que la espresión «Vete a tostar guiyaes» ye una espresión del sieglu XIX que se refier a la intención de querer tener a daquién ocupáu’l mayor tiempu posible y evitar asina la so compañía cafiante. Si Pablo Casado mandase a Abascal a tostar guiyaes asegurábase de tenelu entreteníu un ratadón con un llabor nada necesariu p’asina perdelu de vista. Lo malo ye que’l PP, al xuntase con un partíu tan tóxicu como Vox, nun denuncia cuando dicen coses como que «la violencia nun tien xéneru» y que la llei de 2004 «ye puru femismu».
Ello ye que Pablo Casado debía cunta-y a Abascal qu’España rexistra 1.135 asesinatos machistes de magar hai estadístiques. Estos casos namás correspuenden a los crímenes cometíos contra les muyeres y los sos fíos per parte de les pareyes o ex pareyes d’estes, mentanto que la banda terrorista ETA asesinó a unes 850 persones en cuasi 40 años d’historia lo que lóxicamente provocó’l refugu de tola sociedá y llevó a un pautu d’Estáu contra esta barbarie. ¿Qué pasa cola violencia machista? Les encuestes del Centru d’Investigaciones Sociolóxiques (CIS) recueyen que la violencia de xéneru, la violencia machista, nun ye relevante pa un 98% de la población a pesar de que dende 2003 se contabilizaren 1.135 asesinatos. Pero hai qu’añadir la violencia vicaria: la otra cara de los crímenes machistes, cuando los maltratadores dan un pasu más y maten a los fíos pa causar el máximu sufrimientu a una madre, exércese sobre una persona en sustitución d’otra. Y eso foi lo que fixo Tomás Gimeno, que quixo condenar a la madre de les sos fíes, Anna y Olivia, «a un sufrimientu pa tola vida».
El casu ye que’l padre Báez culpa de los asesinatos de les neñes a la víctima, la madre, diz que «recueye lo que semó» y camienta que’l presuntu asesín ye otra víctima pola rotura matrimonial y «la infidelidá». Atrévese tamién a dicir que les neñes taríen vives si la madre nun rompiera’l matrimoniu porque «antes l’home aguantaba a les muyeres anque se volvieren lloques». El Gobiernu de Canaries, al igual que yá fixeron el Cabildu de Gran Canaria y la Fiscalía Provincial de Les Palmes va actuar contra él. Ángel Víctor Torres, presidente de Canaries, diz que qu’estes vergonzoses declaraciones nun deben quedar impunes porque «xustifiquen lo inxustificable».
Pese al negacionismu de la ultraderecha sobre la violencia de xéneru que ruempe consensos políticos, los datos son claros: el mes de mayu foi'l mes más negru de la violencia machista dende 2012. El Ministeriu d'Igualda confirmó siete muyeres asesinaes, amás del crime d'una menor. Per otru llau, según la macroencuesta acerca de la violencia sobre les muyeres espublizada en setiembre del añu pasáu más de la metá de les muyeres que viven n’España sufrió dalgún tipu de violencia machista a lo llargo de la so vida, esto ye, 11,3 millones de muyeres. Nesti sentíu, más de cuatro millones padecieron violencia física, pol fechu de que l’home considera que tien plenu derechu a caltener los privilexos que cree propios del so sexu.
Ye un error pensar qu’hai un perfil social de maltratador. Los homes d’altu o baxu poder económicu, dende executivos a peones d’obra, homes con escasa o muncha formación profesional puen exercer violencia coles muyeres. Los maltratadores nun son enfermos mentales y nun maltraten porque tienen adicciones; suelen ser responsables dafechu de lo que faen. Lo peor ye que munches muyeres nun denuncien porque esperen que, más aína que tarde, la situación meyore, y la incomprensión familiar nun ayuda a que salgan del infiernu nel que tán atrapaes. Amás, en munches ocasiones paez-yos que los fíos sufriríen más con una separación; y polos sos fíos aguanten lo que seya ensin dase cuenta de lo perxudicial que ye educase nun ambiente de violencia.
Beatriz Zimmermann, la madre d’Anna y Olivia, les dos neñes asesinaes pol so pá, Tomás Gimeno, asoleyó una carta abierta’l día depués de conocese los tráxicos detalles del homicidiu na que diz que, «anque agora sintamos el mayor odiu y dolor, nun seya pa trayer más sufrimientu al mundu, sinón lo contrario». Camienta que «elles morreríen en cuerpu, pero la so alma ta con toos nós pa siempres, ayudando a tener más conciencia, amor y respetu».
Pues tando asina les coses, los políticos demócrates nun habríen tardar nin un segundu más en mandar a tostar guiyaes a aquellos partíos qu’alienden el discursu del odiu y que nun tienen conciencia, amor y respetu poles muyeres maltrataes, nin polos sos fíos. ¿Tendrá’l suficiente valor el PP pa dexar de facer manifestaciones fallíes cola ultraderecha tanto en Colón, como en cualesquier llugar d’España? Paez que nun ta dispuestu a xebrase de Vox porque quier gobernar seya como seya, asina que ye casi seguro que va siguir asumiendo’l so discursu homófobu y machista.