Esti sábadu rexistráronse más de 139 millones de casos de Covid-19 en tol mundu y yá son más de tres millones de persones les que morrieron por coronavirus dende que la Organización Mundial de la Salúd declaró l’andancia. El panorama ta lloñe de ser vidable. Pa enriba d’esta terrible situación, tal como diz l'inmunólogu Alfredo Corell, axúntense dellos tertulianos pa falar de temes médicos como si supieren de lo que falen, inorando que «en ciencia nun s’opina» porque ta basada en fechos y evidencies. Según Corell, hai tres fechos incuestionables: les vacunes son segures, nun obliguen a naide a poneles y nun ye’l momentu «de barra llibre» porque nun tenemos bastantes. Cuando personaxes como Tamara Falcó dicen que «la vacuna que me pongan debe ser súper segura» porque ye llibre, nun valora’l fechu históricu de vivir nun país con cuatro tipos de vacunes con una eficacia escelente, mentanto dellos países n’África nun tienen nenguna. Cruz Roja Internacional denunció que’l 61,5% de les vacunes alministráronse nos 50 países más ricos del mundu y namás un 0,78% nos 50 países más probes.
Tando asina les coses, el ministru de Ciencia ya Innovación, Pedro Duque, manda un recáu a Bosé y los negacionistes: «Un famosu tien que cuidar les sos opiniones y lo que diz» porque confundir a les persones ye mui fácil. Yo diría más, pue ser tráxico cuando falamos de dalgo que causa tantes muertes como son les andancies. Miguel Bosé, que vive ayenu a a la ciencia, asegura ensin ponese coloráu, que ye negacionista y que lo lleva «cola cabeza bien alta». Atrévese hasta a esparder ensin nenguna prueba qu’hai «un plan tramáu» por un cartel de millonarios psicópates que van cayer «unos detrás d’otros». Ello ye que nesi complot mundial nes vacunes del coronavirus yá dicía a principios del branu que diben implantanos un microchip (o nanobot, n’otres versiones d’esta teoría) pa controlanos al traviés del 5G, y el casu ye que, pese a ser una fatada, tuvo della relevancia. Ensin dulda consumir dos gramos diarios de droga a lo llargo de 20 años dexa rastru nel cerebru. Él mesmu desplícalo mui bien: «les drogues dan puntualmente unes visiones de coses que son interesantes, revolucionaries incluso. Pero cuando pasen a ser un consumu habitual, pierden esi sentíu», y apaez el demente ensin regles. Darréu d’ello, un demente ensin sentíu provoca que pueas acabar siendo célebre non pol trabayu, sinón por dicir una barbaridá tres otra, y llamentablemente nun ye l’únicu.
L’humorista Edmundo Arrocet, entró esta selmana nel «ruíu» mediáticu, anque les sos palabres nun tuvieron nin gota de gracia, nin muncho menos de poesía: «Entamen a 'huevear' qu’hai que vacunase yá. Fálenme d’una vacuna y nun la pongo nin cagando. Nun quiero saber nada con vacunes de nengún tipu. ¡Nin una!». Espero que depués de sentir esa babayada a la población nun-y provoquen mieu o desconfianza les vacunes escontra’l Covid-19, sinón ganes de pone-yun corchu na boca a esi patéticu personaxe. Cuando lu sentí, víniéronme al pensamientu les sabies palabres de Quevedo: «Tolos que paecen fatos, sonlo y, amás sonlo tamién la metá de los que nun lo paecen».
El casu ye que, mientres que na encuesta Cosmo-Spain fecha pol Institutu de Salú Carlos III nun estudiu entamáu pola Organización Mundial de la Salú en 31 países reflexaba que la confianza nes vacunes permanecía alta enantes de Semana Santa -un 74% pincharíase seguro y un 15% non-, nuna encuesta más actual, de YouGov, un 52%, camienta que la vacuna d’AstraZeneca nun ye segura tres la decisión de dellos países europeos de paralizar el so usu. A lo cabero de febreru yera namás un 25% la cantidá d’encuestaos que nun s’enfotaben na vacuna británica. Ye dicir, nun mes la desconfianza n’AstraZeneca duplicóse n’España. El xefe de serviciu de Medicina Preventiva y Epidemioloxía del Hospital Clínic de Barcelona, Antoni Trilla, diz que les especulaciones y les informaciones «contradictories al rodiu de les vacunes como AstraZeneca y Janssen» xenera dulda, desconfianza y mieu. Nesta «situación de crisis humanitaria, d’andancia» les vacunes son los instrumentos meyores pa protexenos; por esti motivu, los gobiernos deberíen aceptar les decisiones de l’Axencia Europea de Medicamentos (EMA) y meyorar cuanto primero meyor la so estratexa de comunicación. Tamién tendríen que tener en cuenta que buscar un 100% de seguridá ye una entelequia, un imposible, a pesar de tolos avances acaecíos.
Marie Curie esplicaba que teníemos que comprender pa nun tener mieu. Ye necesario saber que’l riesgu de morrer por Covid ye 2.300 veces mayor que’l de facelo por una vacuna. Si garramos les estadístiques descubrimos qu’hai más probabilidaes de ganar el Gordu de la llotería que xenerar trombos tres la vacuna británica. Pero hai munches más coses del día a día que tienen más probabilidá de que pasen enantes de sufrir un trombu por poner esa vacuna: una persona tien 15 veces más probabilidá de morrer depués que la pique una abeya (1 de cada 67.190) y 100 veces más probabilidá d’atopar un trébol de cuatro fueyes (1 entre 10.000).
Prestaríame acabar con una reflexón: La lluna, les marees, la nueche y la parte escura y friki de los negacionistes, inorantes ya egoístes pue contaxanos tanto como’l coronavirus, amás de desconectanos del restu de les redes neuronales. Por esti motivu, ye obligao combatilos si nun queremos convertinos en faltosos que meten los dos pies nel agua pa comprobar la so fondura. Esperemos que nun nos faga falta contratar a milenta salvavides pa rescatar del agua, o del virus, a tantos descerebraos, célebres o non, qu’anden per ehí espardiendo por aire, mar y tierra tantes idees falses ya peligroses.