En 1893, la ex colonia británica, Nueva Zelanda, adelantó al restu de países del mundu cuando aprobó’l votu femenín. Dos sieglos depués dalgunes de les sos reivindicaciones siguen tando n’axenda de los movimientos feministes: el fin de la brecha salarial, la prevención de la violencia contra les muyeres, la independencia económica femenina, el derechu a una pensión de xubilación, la reforma de les lleis de matrimoniu y divorciu y l'accesu a una sanidá y a una educación de calidá, non discriminatoria yá igual a la de los homes.
Nun foi hasta 1933 cuando n’España les muyeres pudieron votar pa convertise en ciudadanes de plenu derechu. Nesti añu cúmplense 90 años dende l’aprobación del votu femenín. Esti hitu llogróse gracies al llabor de la valiente y combativa diputada Clara Campoamor que venció los prexuicios de los diputaos que nun víen con bonos güeyos que les muyeres tuvieren un papel activu na política. La República dio a les muyeres dalgo que yera inimaxinable: la oportunidá d'una presencia na vida social y política. Amás de llexislar pa crear una escuela pública, obligatoria, laica y mista que pretendía favorecer el respetu y el desarrollu integral ente alumnos y alumnes, regulóse l'accesu de les muyeres a cargos públicos; reconociéronse derechos a la muyer na familia y nel matrimoniu, como'l matrimoniu civil, el derechu a tener la patria potestá de los fíos y suprimióse'l delitu d'adulteriu aplicáu namás a la muyer. Al empar, la llei del divorciu foi una de les más tardíes, pero tamién la más progresistes de les esistentes hasta esi momentu n’Europa. Coles mesmes, obligóse al Estáu a regular el trabayu femenín y a protexer la maternidá, con ello, prohibiéronse les causes de despidu por contrayer matrimoniu o por maternidá y aprobóse la equiparación salarial pa dambos sexos.
Llamentablemente unos años más tarde la dictadura franquista eliminó tolos derechos promovíos pola República, lo que provocó que les muyeres fueren apartaes ensin miramientos de la política y el trabayu remuneráu. Segregóse la educación y nel currículun de les neñes había asignatures específiques coles mires de completar la so formación pa ser perfectes ames de casa. Ello ye que’l réxime relegó a les muyeres al «llabor diariu, a los fíos, a la cocina, a la dote, a la güerta». Per otru llau, impúsose un códigu de vistir d’acorde a les «bones costumes». Consideróse obligatorio la «honestidá nos vistíos, ensin esaxerar escotes, faldes y mangues» y suprimióse hasta’l «fumar ente les muyeres» por consideralo «poco femenino». José Antonio Primu de Rivera, fundador de la Falange, dicía: «tampoco somos feministes. Nun entendemos que la manera de respetar a la muyer consista en sustraela del so magníficu destín y ponela a funciones varoniles…. L'home ye enforma egoísta; sicasí, la muyer casi siempres acepta una vida de sumisión, de serviciu, d'ufrienda abnegada a una xera». Ello ye que l’artículu 57 del Códigu Civil recoyía que la muyer taba obligada unillateralmente a obedecer al so home y nun podía facer nenguna xestión ensin el so consentimientu. Hebo qu’esperar a qu’en 1977 llegare la democracia pa reestablecer los derechos de les muyeres. En poco tiempu España llogró importantes meyores en materia de derechos de la muyer. Sicasí, hai numberoses cuestiones por resolver pa proclamar una igualdá de xéneru plena na mayoría de los países. Según el Foru Económicu Mundial entá falten 170 años pa zarrar dafechu la brecha de xéneru. Un recién informe del Secretariu Xeneral de les Naciones Xuníes sostién que les muyeres siguen ensin tener abonda representación na vida pública y na toma de decisiones. Mentanto, malpenes pasen de 20 países nes que les muyeres son xefes d'Estáu o de gobiernu, al tiempu que nos congresos o parllamentos nacionales les muyeres algamen el 24,9% de representación. Si seguimos a esti ritmu los espertos camienten que la igualdá de xéneru ente xefes de gobiernu va tardar 130 años en llograse.
Nel Día Internacional de la Muyer, ONU Muyeres escoyó’l lema, «por un futuru igualitariu nel mundu de la covid» col que sorraya l'enorme esfuerzu de les muyeres y les neñes pa forxar un mundu más igualitariu. La so directora executiva, Anita Bhatia, alvierte de que l’andancia podría acabar con 25 años d’una creciente igualdá de xéneru, pues ta frenando la participación y el lideralgu de les muyeres ensin que, pese a la crisis provocada, malpenes un 12% de los países desarrollen actives midíes propies pa les muyeres. Per otru llau, alviértese de qu’hai un 11% más de muyeres probes por causa de la pandemia, a lo qu’hai qu’añadir más carga de trabayu nes cases, mientres qu’esiste’l riesgu de perder presencia al mandu d’instituciones y empreses. Nesti sen, Ángeles Durán, socióloga ya investigadora del CSIC denuncia’l riesgu tan altu de qu’en poco tiempu puea perdese los derechos llograos tres décades de llucha. Tando asina la situación, hai un peligru real de que la población española, sobre manera la más moza, acabe dexándose seducir polos partíos ultres que traten de dexar a les muyeres otra vuelta más en segundu planu, con constantes ataques al femenismu y una actitú negacionista frente a la violencia.
Esti añu a causa de la COVID-19 les movilizaciones feministes van ser d’otra manera, pero la llucha sigue pa que s’acabe la resignación, l'acatamientu de la desigualdá social y el repartu desequilibráu del poder. Necesitamos un tiempu nuevu na que la conciliación, la corresponsabilidá y la perspectiva de xéneru seya la política prioritaria en tolos países. Nin podemos, nin debemos escaecenos de que güei, más que nunca, necesítase l’impulsu del feminismu; ye dicir, la verdadera igualdá de derechos de la muyer y l’home.