La postverdá, la distorsión a costa fecha d’una realidá, inunda la nuestra vida, anque nun ye un fenómenu nuevu. En dalgunos aspeutos la sociedá nun camudó demasiao a lo llargo de los sieglos. Nel sieglu XV l’escritor y estadista Maquiavelo alvertía de que los homes «son tan inocentes y responden a la necesidá del momentu que siempre hai daquién que pretende engañar porque siempres atopa a daquién que se dexa engañar». El casu ye que nos últimos años la política del engañu, les fake news, medren a una gran velocidá. El filósofu Aristóteles dicía que pa destapar una mentira necesítase «mostrar la causa de la falsedá» porque quien mienten van repetir la falsedá milenta vegaes pa tener más probabilidaes de qu’acabe sonando a verdá. Por esti motivu, ye necesario denunciar toles falsedaes qu’al estilu Pinochu llancen les dereches escontra la nueva llei educativa qu’entró en vigor el 19 de xineru.
Primera falsedá: Una llei improvisada que nun cuntó con nengún sofitu
Ente les munches manifestaciones de les derecheses contra la LOMLOE recoyemos la de Lorena Roldán, (Cs) que calificó a l’aprobación de la nueva llei d’un auténticu atropellu cometíu con «nocturnidá y alevosía». Nesti sen, Pablo Ruz (PP) tacha al Gobiernu d’inmoral por tramitala «de manera precipitada», mientres que’l so compañeru de partíu Teodoro García Egea alvierte que van siguir «movilizando a los ciudadanos y a les instituciones» pa «torgar la implatación de la nueva llei educativa que menos escuchó al profesoráu, families y alumnáu», nes comunidaes autónomes que gobiernen. El portavoz de Vox na Xunta Xeneral del Principáu d’Asturies, Ignacio Blanco, diz que la llei «sal col menor sofitu de tola democracia».
La verdá: La LOMLOE deroga la LOMCE, una llei retrógada, elitista, dogmática y segregadora que namás «llogró» un gran aumentu de les tases de fracasu, abandonu escolar prematuru, un mayor númberu de repeticiones y foi la más protestada pola comunidá educativa. Cuntó tamién cola oposición de más de diez grupos parllamentarios que firmaron un compromisu pa la so derogación. Según un estudiu de la Universidá Autónoma de Madrid mentanto que’l 93’4 % de los docentes camienten que s’ellaboró ensin cuntar cola so opinión, pal 80% foi innecesaria. Dende 2012 a 2018 hubo más de 24 manifestaciones d‘estudiantes y docentes y al menos tres fuelgues nes que participaron les families, docentes y estudiantes. Ye sabío que’l PP nunca nun llegó a un acuerdu p’aprobar nenguna llei d’educación. Cuando nel añu 2010 el daquella Ministru d’Educación, Ángel Gabilondo, presentó’l «Pactu Social y Políticu pola Educación» pa una década, llogró un acuerdu ente sindicatos, asociaciones de padres (de la educación pública y privada), patronal de centros privaos y tolos partíos políticos, pero’l PP nun duldó en descolgase a última hora por cuenta les bones perspectives que-y daben les encuestes énte la proximidá de les elecciones.
Agora, esi mesmu partíu atrévese a reclamar un alcuerdu na Llei d’Educación que dure nel tiempu y que cuente con tolos sectores implicaos. Mentanto la LOMLOE almitió na so tramitación 300 aportaciones y 250 enmiendes de la comunidád educativa en casi dos años de trabayu y foi aprobada por siete partíos, la LOMCE namás almitió 12 enmiendes y aprobóse en solitario pol rodiyu de la mayoría absoluta del Partíu Popular. La Confederación Española d’Asociaciones de Padres y Madres del Alumnáu (CEAPA), defende la nueva llei porque se tramitó col «máximu consensu y avanza a enseñances más modernes ya inclusive».
Segunda falsedá: La LOMLOE ataca a la concertada y acaba cola llibertá de les families pa escoyer un centru educativu
A José Manuel Marín, senador de VOX, paez-y que la LOMLOE silencia d’una manera dramatica’l papel de la familia. El popular Jesús Vazquez camienta qu’aniquila’l derechu de los padres a actuar como familia. La diputada del PP Sandra Moneo diz que «destierra el derechu de los pas a escoyer el centru educativu pa los sos fíos». De fechu la concertada pidió va unos díes amparu al Parllamentu Européu.
La verdá: Ello ye que nel anteproyectu de la LOMCE, la CEAPA xugaba coles sigles, una «Llei Orientada a Mimar a la Conferencia Episcopal» yá que la iglesia diba convertise asina nun lobby nel ámbitu educativu. La «llei Wert» traxo con ella unos recortes vergoñosos qu’atacaron a la educación, especialmente a la pública, frayando l’equilibriu respetáu hasta entós ente les dos redes (reduxo’l 1,5% na inversión por estudiante na enseñanza concertada, mentanto na pública llegó al 13,8%). La LOMLOE aplica una midida mui necesaria que la comunidá educativa llevaba reclamando a lo llargo de munchu tiempu: revertir los cambios promovíos pola LOMCE y recuperar la participación de tolos implicaos na gobernanza de los centros. Dende agora los Conseyos Escolares van ser muncho más democráticos y participativos. La LOMLOE, tal como diz la Constitución, reconoz el derechu a recibir la educación relixosa y moral que tea d’alcuerdo coles convicciones de les families, el derechu de les persones físiques y xurídiques a crear nuevos centros docentes y el derechu a la llibertá d’enseñanza. Cuando les dereches se manifestaron escontra la nueva llei glayando llibertá, tal como dixo la Ministra d’Educación, prostituyen el términu llibertá.
Cola LOMLOE la llibertá d’escoyer los centros va ser pa toles families, non solo pa les de más posibles. Les comisiones d’escolarización van impedir que l’alumnáu con menos recursos se concentre nos llamaos «colexos-guetu» y cuando haya más demanda van siguise unos criterios oxetivos: hermanos matriculaos, proximidá, ingresos, a los qu’hai qu’añadir ser familia numberosa o otres circunstancies. El socialista José María Oleada diz que s’acaba col modelu de la «llei Wert» que nun dexaba decidir a les families: «yeren los centros concertaos los que dicíen quién entraba y quién non».
Acordies con esto, cola LOMLOE la educación pública va ser l’exe vertebrador del sistema (na actualidá la escolarización pública ye del 67% mientres que la media de la UE algama’l 81%), pero ye falso dafechu que la nueva llei vaya zarrar centros educativos y quitar places. Lo que sí fai ye desaniciar la espresión 'demanda social' que propunxo la LOMCE y que-y permitió a la concertada sacar más places. Agora encamiéntase a la concertada a asumir el so compromisu social cola educación, incluida la escolarización de los estudiantes de families más desfavorecíes económicamente. Cola nueva llei va prohibise a los centros concertaos aplicar les mal llamaes cuotes voluntaries; al menos nun 90% yeren obligaes y llegaben a una media de 255€ al mes, lo que torgaba l’accesu de les families con pocos o ensin recursos a esti tipu d’enseñanza.
El domingu pasáu foi’l Día Internacional de la Educación y dende’l Parllamentu Européu recordábennos que la educación ye’l biltu de cualesquier sociedá avanzada y que namás la educación garantiza la igualdá d’oportunidaes nel accesu a la formación, a la cultura, a los valores que necesita la sociedá. Pues la LOMLOE precisamente garantiza esa igualda d’oportunidaes que la LOMCE del PP trató de suprimir. Hai qu’abrir bien los güeyos y nun dexanos engañar poles falsedaes de les dereches nun tema tan esencial.