Unidas Podemos, PNV y independentistes reclamen al Congresu que apoye la oficialidá del asturianu
AGORA
Demanden nuna PNL que s'usen les distintes llingües nel TC, el Supremu, les Cortes Xenerales o en RTVE
03 dic 2020 . Actualizado a las 17:16 h.Unidas Podemos, ERC, Bildu, PNV, Junts, PDeCAT, Más País, Compromís, CUP y BNG rexistraron una proposición non de llei (PNL) qu'encamienta al Congresu a qu'apoye les reformes estatutaries pa que se reconoza la oficialidá de les llingües propies del país qu'entá nun llograron esa condición, como ye'l casu d'Asturies.
Coles memes, reclamen poner fin a la «imposición llegal esclusiva del castellanu na normativa estatal» y que se permita l'usu de les distintes llingües del país n'instituciones nacionales. Ente elles, citen les Cortes Xenerales (Congresu y Senáu), amás de nel Tribunal Constitucional, el Supremu y l'Audiencia Nacional, l'Axencia Tributaria, la Seguridá Social y empreses públiques como Radio Televisión Española. La iniciativa parllamentaria pal so debate nel Plenu del Congresu tamién esixe que se garantice'l deber de conocer la llingua propia de los funcionarios que dan serviciu nos territorios mentaos.
Los diez grupos firmantes de la iniciativa espliquen na so PNL qu'España tien que cumplir colos alcuerdos internacionales que ratificó, como la Carta Europea de les Llingües Rexonales o Minoritaria, amás de la Declaración Universal de los Derechos Llingüísticos o'l Protocolu pa la Garantía de los Derechos Llingüísticos.
Acabar cola «discriminación llingüística»
Nesta llinia, encamienten al Congresu pa que se garantice la diversidá llingüística y el pluralismu, porque l'Estáu «tien de ser escluyente con toles discriminaciones, tamién la llingüística». «Esti Estáu, que parte d'una tradición monollingüe na alministración central, tien que ser consciente de la situación de discriminación a la que foron sometíos los habitantes d'estes llingües y xenerar polítiques actives de la recuperación de la so dignidá y autoestima que permitan l'exerciciu efectivu de los sos derechos llingüísticos», razona la proposición.
Por eso, estes formaciones demanden que s'entamen toles acciones pertinentes pa que les llingües distintes al castellanu «gocien de la mesma reconocencia», y los sos habitantes «de los mesmos derechos y deberes que reconocen al castellanu». Asina, reclamen que se garantice'l «deber de conocencia pol funcionariáu que da servicios en territorios con llingua propia», amás de les midíes afayadices «pa estender la conocencia xeneralizada de les llingües de los respectivos territorios». Tamién encamienten a «asumir la realidá plurillingüe y garantizar que l'alministración del Estáu funcione nes distintes llingües independientemente del so allugamientu físicu, ente otros, nes Cortes Xenerales, los tribunales Constitucional, Supremu y l'Audiencia Nacional o organismos como l'Axencia Tributaria, o la Seguridá Social». Criteriu qu'estienden, amás, a otres empreses o entidaes públiques como RTVE.
Usu de llingües ensin rangu cooficial na alministración
Xunto al impulsu de reformes estatutaries naquellos territorios con llingua propia ensin rangu de cooficialidá, piden que l'Estáu garantice la capacitación de les llingües propies del personal de toles alministraciones públiques, incluyida la Xusticia, y l'usu xeneralizáu nes páxines oficiales, amás de la «reconocencia internacional» d'estes llingües en «paridá col castellanu». D'esta forma, llamaron a poner fin a la «imposición llegal exclusiva» del castellanu na normativa estatal, qu'afecta «de manera frontal al ámbitu económicu y sobremanera al etiquetáu». Énte eso, esixen la puesta en marcha d'una política que termine con esta «discriminación» y fomente la conocencia d'otres llingües. P'acabar, encamienten a que se permita l'usu alministrativu de les distintes llingües, «ente territorios del mesmu espaciu llingüísticu, dientro y fuera de les fronteres alministratives» y que se suscriban alcuerdos «pa la recepción recíproca de los medios de comunicación dientro d'esos espacios llingüísticos».
Podemos: ye una defensa d'un derechu fundamental
La portavoz axunta d'Unidas Podemos, Sofía Castañón, destacó qu'esta PNL busca «la defensa de los derechos de los falantes, de les distintes llingües del Estáu», pues son derechos fundamentales. «Eso nunca ye amenorgar los derechos d'otros. Reconocer, dignificar la nuestra diversidá llingüística fainos un país meyor, descríbenos d'una manera más cierta y ye d'una riqueza cultural innegable», destacó, informa Europa Press.