Na definición del DALLA, el llibru ye un oxetu formáu por un conxuntu de fueyes de papel escrites y encuadernaes. Magar qu'a efeutos llegales ha tener 49 páxines o más, escluyíes les cubiertes. El llibru infantil y xuvenil ye l'empobináu a llectores non adultos, de prellectores a adolescentes. Llibru n'asturianu ye l'escritu n'esti idioma.
Regalar llibros ye regalar una ventana a la imaxinación y a la cultura. Nel nuesu casu a l'asturiana, pola mor de la llingua na que s'escriben. El fomentu la llectura habría ser un focu cimeru de la política llingüística n'Asturies. Nun hai más que ver la baxa visibilidá de la nuesa lliteratura nes llibreríes y nes biblioteques del país.
El mes del llibru entama'l 2 col Día Internacional del Llibru Infantil y Xuvenil y sigue'l 23 col Día Internacional del Llibru. Cola so continuidá na cellebración propia del país del Día del Llibru n'Asturianu, coincidiendo col Dia de les Lletres Asturianes, los primeros vienres de mayu que nun coincidan col Día del Trabayu.
Esti añu cai'l día 8. Pola mor del andanciu de coronavirus aplázase a la seronda, xunto al Día de les Lletres Asturianes. El primer Día de toos cellébrase dende 1967 pola mor de la nacencia del escritor danés Hans Christian Andersen. El segundu faise dende 1988 pola mor de la muerte de Cervantes y Shakespeare. El tercer Día entámase dende fai 41 años, nel que la Conseyería de Cultura regala un llibru conmemorativu de la Selmana de les Lletres Asturianes, cola merca d'otru n'asturianu.
Too ello fai que s'allargue un mes dedicáu a la llectura, que pesia tolos pilancos paez que surde otra vegada. Magar que la edición de llibros n'asturianu nel 2018 foi de 82, nuna baxada dende los 167 nel 2008, por exemplu.
Esti mes del llibru pue ser un bon argumentu, algamable pa tolos gustos y edaes, magar l'andanciu , p'averase a esi mundiu de la creatividá, la cultura y la información que remanez nos llibros, anque seya de mou dixital. Ye una bona forma de pasar los llargos díes d'esta pandemia del sieglu XXI. Y si de pasu faise na nuesa llingua, meyor. Porque sedrá aprofitar el tiempu de confinamientu pa medrar na nuesa identidá.