La versión asturiana de la enciclopedia cooperativa online cuenta con cuasi 100.000 artículos y más de 57.000 usuarios rexistraos
12 ago 2019 . Actualizado a las 05:00 h.99.718 artículos, 57.829 usuarios rexistraos y 154.273 páxines totales. Esos son los númberos de la Wikipedia n'asturianu qu'acaba de cumplir 15 años de percorríu. Nestos trés llustros convirtióse na versión con un mayor porcentaxe de biografíes de muyeres, más de 52%, superando asina a la galesa que lideraba esti apartáu. Una ventena de voluntarios revisa los testos pa garantizar l'autenticidá de los conteníos. La versión asturiana cuenta con nueve alministradores, ente ellos Víctor Suárez, y 143 usuarios activos de tol mundu.
La Wikipedia n'asturianu creó'l primer artículu'l 2 d'agostu de 2004 y el 20 de payares de 2007 yá perpasaba los 10.000 artículos. Anguaño, a fecha de 9 d'agostu de 2019 y a piques d'algamar los 100.000, ocupa'l númberu 63 nel ránking de toles wikipedias, per delantre de la cantonesa, la bretona o la bengalí. Magar que nun ye una llingua oficial, asítiase penriba d'otres que sí tán reconocíes poles sos Estaos.
Al marxe del trabayu online, los alministradores realizaron nestos años otru tipu d'actividaes d'alcuentru, espardimientu cultural y promoción del asturianu, como por casu el wikialcuentru celebráu en Bimenes va unos años, nel que tamién participaron responsables d'otres Wikipedies como la castellana, la gallega, la vasca o la catalana. Bimenes foi'l primer conceyu asturianu n'aprobar la cooficialidá y convirtióse en tou un referente tamién nel ámbitu del conocimientu llibre. A lo llargo d'estos 15 años impartiéronse talleres pa bibliotecarios de toa Asturies y pa escolinos y alumnáu de la ESO con motivu del Día de les Cienices Asturianes y, per otru llau, fízose un llabor d'espardimientu del proyeutu tanto n'Asturies como'l restu del Estáu, dende Donostia a Barcelona y tamién nel ámbitu internacional de la mano de Víctor Suárez que tuvo presente n'alcuentros internacionales en Montreal, Ciudá del Cabu o visitando a la comunidá d'usuarios de Wikimedia n'Armenia.