Un «¿Qué?» d'estos despectivos. Un «¿Qué?» vacililla. De vacile. Provocador. Que t'increpa. Esa ye la tónica que llevamos viviendo dende va tanto tiempu que nun sabríemos onde colocar l'aniciu.
Los asturianos y les asturianes somos xente con paciencia. Mui calientes cuando la perdemos, pero solemos guardala por muncho. Sicasí, los nuesos gobernantes deben pensar que de pacientes somos yá tontos.
Vendiéronnos que diba haber (va más de 30 años) una reconversión industrial que nun diba perxudicar el nuesu texíu productivu. Abultó más un desmantelamientu qu'una reconversión. L'actividá económica asturiana viose afeutada dende les estayes más industriales pola entrada na UE, hasta, y col tiempu, el cambiu de modelu ganaderu igualmente intensificáu pola PAC; ensin que los gobiernos autonómicos y estatales punxeren igua. Nesti sentíu, una noticia apaecía n'avientu de 2018 mos indicaba que yá se plantegaba pal sector pesqueru una reconversión de la flota. Ca vuelta que siento la pallabra «reconversión» respigo.
Dixéronnos qu'había de transitar haza otros modelos enerxéticos -¡ojo! Dixéronlo nos años 90-y en dengún momentu yo vi que fixeran coles perres daqué útil pa facer esa transición famosa. Pero nos últimos años vien sonando y repicando'l «soniquete» de qu'había de piesllar les mines porque había de transitar... Ehí quedaba un tanto alucináu. Entíendanme. ¿Cuál ye l'argumentu básicu que mos diz que quemar carbón ta rellacionao con estrayelo?
Entendería, lóxicamente, que s'anunciare -a cuenta de la transición enerxética- el pieslle de les térmiques. ¿Pero de les mines? Seya como fuere, lo cierto ye que mos piesllen primero la materia prima, y llueu, en tou casu, la tresformación n'enerxía d'esa mesma materia prima. Y curiosamente resulta que pieslla la estracción de carbón... pero sigue la quema... con carbón foriatu, of course.
Son eses contradicciones que nun llogro yo a ver. Porque claro, si con fondos mineros se fexo un ruinosu Gran Musel; punxéronse faroles nel Uviéu de Gabino; dedicáronse perres asgaya n'empreses pantasma, que llueu a la fin la sovención pesllaben, namás que recolocando una «ventena», como quien diz, de trabayadores; Museos inhabitaos; centros en desusu o abandonaos en metá'l monte; piscines ruinoses... y col Estáu Español debiendo tovía unos 200 millones d'euros.... ¿Cómo nun se-y cai a naide la cara vergoña?
Claro, a ún qu'a poco piense, verá que nun tien muncho xeitu nin l'orde de la transición, nin les pallabres usaes pa definir lo qu'ocurre, faciendo d'Asturies una suerte de Pramu Verde más que de paradisu nel cual queremos vivir, pero qu'al mesmu tiempu sofrimos con auténtica desesperación.
Señores, tenemos de ver claro que nun podemos permitir que desarticulen ensin más les nueses actividaes tradicionales y económiques; que nun puen facer de denguna manera na ensin mirar les consecuencies, les sustituciones productives o les alternatives a ello; que nun mos vendan fumu nun territoriu onde nel 2017 nacieron 6000 persones y morrieron 13000. Un territoriu onde la tasa suicidios -y nun me falen de la meteoroloxía por favor- ye de les mayores del mundiu. Un territoriu con una gran capacidá productiva ya intelectual que tien de migrar p'alcontrar futuru. Onde se mos diz allegremente que la panacea ye la famosa Área Metropolitana, como si esta gandalla que mos gobierna toviere viviendo nel cordón madrilanu o en Méxicu DF. Onde nesa mesma propuesta s'alude a que ye necesario facer desapaecer el urbanismu dispersu... Que digo yo: ¿Qué ye que vivimos en Valladolid? ¿Qué ye qu'esto ye La Mancha? Que nun tendría problema si fuere asina, pero hai de ser torpones pa querer aglomerar a la xente, dexar morrer el rural y la forma tradicional d'ordenación del territoriu asturianu; pensando que la orografía, la sociedá y el contestu son equivalentes a estes zones. Sedría, al empar, absurdo faer en Valladolid o en La Mancha un sistema d'ordenación equivalente al asturianu: Pos eso.
A la fin, un llugar, la nuesa Asturies, onde el Señor Lastra refuga la llegada de bus escolar a un pueblu d'Aguanes, n'Ayande, denomando a los y les pobladores «antisistema» porque foron a iguar pueblos abandonaos a la so suerte. Cuando más aida tendría d'haber p'ameyorar la situación de les zones rurales, más torgues se-y escurre al Gobiernu precisamente pa frenar la posible recuperación.
Pero ye tradición na FSA dexar pasar el tiempu haber si el problema resuelve solu. El mieu que teo con esto ye que normalmente lo faen esperando a que'l problema desapaeza, y asina nun tener de resolver na. Por exemplu, paez que quieren falar de baxada del paru -pesie a xubir- ensin cuntar con que 20.000 mozos y moces cuelen d'Asturies a la gueta futuru. Asocede cola llingua. Debíen pensar: Bono, nun sofitamos la llingua, morrerán los falantes padremoñales, nun habrá cuasi tresmisión xeneracional, y acabaremos asina con un matu que llevamos a xocostrines dende la Transición. Pos non, dieron en duru.
Dieron en duru como nel casu de les infraestructures, de les comunicaciones... Faennos creyer que queremos un AVE tardiegu que vien yá con unos sobrecostes del demoniu, pa «ganar» 10 minutos nel tiempu viaxe; demientres piesllen marquesines y paraes; infrafinancien la rede de FEVE; caltienen argayos nes carreteres por díes o selmanes; o ñeguen una meyora sustancial de les llinies de bus qu'interconeuten les zones rurales. Nun se piensa en derechos, namás qu'en perres. Y namás en perres que quepan o vaigan pal so bolsu.
Quieren que pensemos que somos una panda maizones que vemos como toles carreteres con peaxe nel Estáu desapaecerán nel 2020, demientres que'l Peaxe del Güerna lu dexen hasta'l 2050. Que toos ellos baxen de preciu, y el de nuesu aumenta. Que los aviones equí nun esnalen. Que tamos completamente en situación de riesgu.
Énte esta debacle que ta acabando con nós, debemos ser firmes. Falar colos nuesos vecinos y vecines. Dende les nueses aldees, llugares, pueblos, conceyos, comarques... pa dir poniendo solución, p'activar la protesta constructiva que mos saque d'esti pozu nel que mos metieron, y del que paez nun mos quieren dexar salir.
Asina que, parafrasiando a un señor de barba de va muncho tiempu, y tomando la llicencia que mos correspuende nel contestu: «Astures de mundiu xuntáivos».