Pola mor de que'l pasu'l tiempu prodúzse tan rápidu o porque la sociedá tresmítenos esi continuu acelerar como si siempres tuvieéremos mieu de llegar los últimos. Nun somos conscientes de la importancia de la evolución de los primeros años de la nuesa vida. Non solo pola alquisición del deprendizaxe: la bipedestación y el llinguaxe, que desendolquen les bases de les cadarmes y capacidaes síquiques que surden y se desendolquen nel procesu educativu. Nesos años alquirimos la capacidá d'amar y ser amáu. Afítense los venceyos d'apiegu seguru y relaciones d'afeutividá que determinen el desendolcu personal, cognitivu, afeutivu y social de los adultos. D'ehí la importancia de los espacios educativos públicos pa compartir la crianza ente families y profesionales de la educación n'edaes tempranes. Etimolóxicamente la pallabra «infancia» bien del llatín «infans» que significa «el que nun fala». Polo que nun tienen votu y pa munchos nun tienen drechos. Como adultos hay que da-yos esa voz. Dende munchos coleutivos educativos asturianos pídese: La integración de la etapa completa de 0-3 años, calteniendo el personal d'anguaño, na Conseyería d'Educación. Garantizar el drechu a recibir educación dixebradamente de cuestiones xeográfiques o económiques. Afitar la igualdá d'oportunidaes y la compensación de desigualdaes, y esto asocede namái pela garantía d'un sistema públicu y gratuitu. Asegurar la cobertoria de sustituciones. Sofitar la estabilidá de les plantiyes docentes actuales y aportar al oxetivu de la pareya educativa en tolos centros, dixebradamente del númberu de matriculaciones. Que s'afiten tamién les ratios encamentaes pola Rede d'Atención a la Infancia de la Comisión Europea. Precísase anubrir les necesidaes de los neños y de les neñes, que tienen el drechu a recibir una educación de calidá, con inmersión llingüística n'asturianu. L'alministración debe y tien la obligación de garantizalu, amás d'orientar na crianza a les families. Hai de desterrar conceutos de «guardería» y dir haza la optimización de les escueles de 0 a 3 años. D'escolinos que sedrán quienes d'adultos puen camudar la sociedá pa meyorala de la escayencia na que paez tar somorguiada anguaño. Porque una educación afayadiza nestes escueles, ye pol bien superior del neñu y el respetu a la infancia como finxu sólidu del mañana.