Más contaminación en Xixón non. La Fabricona como se noma coloquialmente a Arcelor Mittal na fastera oeste de la ciudá incumple los niveles de contaminación del aire afitaos polos estándares normativos de la OMS y l’Axencia Europea de Mediu Ambiente. Y l’activación de los protocolos d’actuación son pocos y de poca intensidá en rellación a la contaminación rexistrada nes estaciones de midición de calidá del aire.
La Plataforma escontra la contaminación en Xixón, lleva años denunciando y manifestándose énte esti abusu y falta de control de la salú pública poles partícules PM10 y PM2,5, pequeñes partícules de povisa, metáliques, cementu, cernada de diámetru menor a 10 o 2,5 micrómetros emitíes na so mayoría na atmósfera, industrialmente y en menor cantidá pol tráficu. Inclusive’l Defensor del Pueblu nel so Informe añal desixe midíes efeutives pa lluchar escontra la contaminación en Xixón. Propón más mididores d’emisiones en La Calzada (Xixón).
Pa enriba pretenden instalar una planta de pirólisis nel puertu d’El Musel. Ye dicir una incineradora de borrafes plástiques nuna fastera yá mui saturada ambientalmente. Xusto nel momentu del grave accidente del fornu altu A n’Arcelor qu’arrastró pel vientu la ñube de polución hasta L’Arena (Xixón) mientres les autoridades nun faen cumplir los protocolos de los planes d’emerxencia esterior, como ye la so obligación.
Nesi sen, recoyéronse yá dellos miles de robles dende’l primer día que pudo facese nel Atenéu La Calzada. Entregáronse 15.000 robles con dos buses enllenos, al Principáu n’Uviéu. Inclusive’l Plenu del Ayuntamientu de Xixón refugó la planta de pirólisis, sacante l’astención del pp.
La xente ta farta de goler malos aires, de llimpiar tolo que cai del cielu y de dir al médicu poles mesmes causes añu tres añu.
Lo mesmo pue dicise de la fastera central del país, sobremanera n’Avilés. Ún de los llugares con peores índices del Estáu. L’aumentu de afeciones y malures arreyaes na piel y nos muérganos de la respiración nun son equivalentes a los del primer mundiu.
Si queremos ser europeos dafechu, que seya tamién nel respetu a les normes ambientales, superaes les másimes permitíes normalmente munchísimos díes al añu nes mayores ciudaes asturianes.
El mieu al poder de les multinacionales nun pue dir per delantre de la salú de los ciudadanos y ciudadanes, con drechos llexislaos en tol nuesu continente.
Por un aire llimpiu, pídese una aición alministrativa permanente y ensin escuses, por un control que llende la contaminación yá.