La iniciativa partió del propiu alumnáu, comprometíu col cuidu del mediu ambiente
26 jun 2023 . Actualizado a las 11:28 h.Un total de 24 alumnes y alumnos del colexu La Quinta´l Texu, xuntu con acompañantes, tuvieron esta selmana na sablera de Xivares, nel conceyu de Carreño, pa participar na recoyida de plásticos y basura de la redolada. Una iniciativa que partió de los mesmos alumnos y alumnes na busca d'acciones pa curiar el mediu ambiente. Los neños y neñes d'ente 7 y 11 años tuvieron dende les 10 y media de la mañana del pasáu xueves percorriendo l'arenal y la so contorna pa recoyer la mayor cantidá posible de basura.
L'oxetivu yera llimpiar la sablera y al empar, concenciar a los más pequenos de la importancia del so cuidu. Pa llegar hasta esta sablera los mozos escoyeron como tresporte'l tren, con menor númberu d'emisiones que l'autobús. Amás, col fin de financiar esti viaxe, entamaron estes selmanes previes un mercadín a la salida del colexu con artículos ellaboraos por ellos mesmos.
Anguaño, el colexu La Quinta´l Texu cumple 10 años dende la so fundación. Xuna década na que demostraron ser un modelu d'educación a siguir, basáu nel so compromisu cola educación respetuosa, la cooperación ente les families de la so comunidá y la so innovación constante nel ámbitu educativu.
Anguaño'l colexu atópase dientro d'un plan d'espansión qu'inclúi l'adecuación de nueves aules, la modernización de les instalaciones esistentes, siguir cola formación de los nuesos docentes, según dotar de más materiales pedagóxicos innovadores.
Amás, el colexu ta comprometíu cola intensificación de los proyectos socioeducativos destinaos a neños y neñes en situación de riesgu d'esclusión social. Al traviés de la so iniciativa Averándonos, La Quinta'l Texu busca collaborar con entidaes que trabayen con infancia en situación de vulnerabilidá n'Uviéu y otros conceyos d'Asturies.
Pa financiar esti ambiciosu proyectu, el colexu La Quinta'l Texu llanzó xuna campaña de recaldación de fondos al traviés de la plataforma Pingo, con cuenta de families, educadores, asociaciones y entidaes públiques y privaes sofiten económicamente esta causa. L'enllaz pa faer donaciones ye esti.