El Conseyu Asesor de Política Llingüística va tar formáu por 36 miembros que nun van cobrar pol so llabor
ACTUALIDÁ
Esti órganu nuevu va poder funcionar en plenu o constituyendo comisiones o grupos de trabayu
10 jul 2020 . Actualizado a las 16:49 h.El Conseyu Asesor de Política Llingüística va tar formáu por 36 miembros que nun van tener derechu a indemnización nin remuneración pola asistencia a les reuniones d'esti órganu nuevu.
El Conseyu, presidíu pola conseyera de Cultura, Berta Piñán, y col director xeneral de Política Llingüística, Antón García, como vicepresidente, va tar formáu pol presidente de l'Academia de la Llingua Asturiana, Xosé Antón Gonzále Riaño; el rector de la Universidá d'Uviéu, Santiago García Granda; el director del RIDEA, Ramón Rodríguez Álvarez; el de RTPA, Francisco Orejas; y hasta un máximu de trenta conseyeros de llibre designación que va normar directamente la conseyera.
Asina se recueye nel Boletín Oficial del Principáu d'Asturies (BOPA) d'esti 10 de xunetu, onde se publica la resolución de composición y funcionamientu del Conseyu Asesor de Política Llingüística.
Esti órganu nuevu va poder funcionar en plenu o constituyendo comisiones o grupos de trabayu. El plenu va aconceyar, polo menos, una vez cada seis meses. Amás, va poder emitir informes y propuestes de calter non vinculante, porque los sos alcuerdos nun van tener efectos directos frente a terceros.
Cola publicación d'esta resolución, el BOPA estrena diseñu a dos columnes pa que les dos llingües, asturianu y castellanu, queden equilibraes y se dea mayor visibilidá a la versión asturiana. Ye un modelu que sirviría nel futuru de cara a la edición billingüe del BOPA, informa Europa Press.