Educación incorpora'l nivel básicu A2 a les pruebes de certificación de Llingua Asturiana

La Conseyería d'Educación publicó nel Boletín Oficial del Principáu d'Asturies (BOPA) la convocatoria de les pruebes de certificación de Llingua Asturiana de 2024, cola novedá de que s'incorpora pela primer vez el nivel básicu A2, amás de los niveles habituales intermediu B2 y avanzáu C1.

Según informó'l Principáu, el plazu d'inscripción va tar abiertu dende esti llunes, 22 d'abril, hasta'l 10 de mayu, dambos incluyíos. La prueba de nivel básicu va ufiertar un máximu de 200 places, mentes que l'intermediu y avanzáu nun van tener llímite d'inscripciones. Namás se va almitir una solicitú por persona y por nivel.

Los cuatro centros d'inscripción son los institutos de Secundaria Aramo, d'Uviéu; Calderón de la Barca, de Xixón; Carreño Miranda, d'Avilés, y Bernaldo de Quirós, de Mieres. La inscripción provisional va ser el día 22 de mayu cola publicación de los llistaos nel portal Educastur y nos centros mentaos. Va siguir un plazu d'allegamientos ente'l 23 y 27 de mayu y la inscripción definitiva ta fixada pal 3 de xunu.

El preciu públicu de la matrícula xube a 31,63 euros. Les persones con plaza van presentar el xustificante de pagu nel centru d'inscripción ente'l 4 y el 17 de xunu. La publicación del llistáu d'almisión provisional va ser el 25 de xunu; el plazu d'allegamientos, ente'l 26 y 28 de xunu, y el llistáu definitivu, el 5 de xunetu. P'acabar, les pruebes van empezar el sábadu 28 de setiembre col bloque 1, que se compón d'exercicios de producción y coproducción de testos escritos, de comprensión de testos orales y de testos escritos. Y, a partir del 7 d'ochobre, van principiar les pruebes del bloque 2 con exercicios de producción y comprensión de testos orales y de mediación.

L'añu pasáu presentáronse 136 persones a les pruebes: 72 al nivel intermediu B2, con un 45,8% de certificaciones, y 64 al nivel avanzáu C1, con un 71,9% de certificaciones, informa Europa Press.

---

---