«Surdiversu», l'antoloxía de 50 años de poesía asturiana que percuerre'l Surdimientu con 131 autores n'asturianu
AGORA
Les poetes asturianes contemporánees aborden una variedá de temes que van dende la naturaleza y la identidá cultural hasta les cuestiones de xéneru, la política y les emociones humanes
03 abr 2024 . Actualizado a las 11:06 h.La lliteratura asturiana ye bien bayurosa dende’l so aniciu. Na estaya poética destaquen tamién dellos trabayos, sobre manera na dómina que va dende l’empiezu del Surdimientu hasta anguaño. Y esi llabor bien granible tien el so bon reflexu na obra nueva «Surdiversu, antoloxía de 50 años de poesía asturiana», un llibru editáu por Cuatro Gotes Ediciones con Berto García como coordinador, nel que s’amuesa una escoyeta de poemes de les obres espublizaes nel mediu sieglu últimu.
Les poetes asturianes contemporánees aborden una variedá de temes que van dende la naturaleza y la identidá cultural hasta les cuestiones de xéneru, la política y les emociones humanes. Les sos obres reflexen les realidaes sociales y los retos a los que s’enfrenten les persones na sociedá asturiana actual, aportando una visión única y personal d’esta realidá.
Nel llibru apaecen autores de toles xeneraciones siempres que tenga un volume propiu asoleyáu. Un poema de cada autor que va permitir a los llectores conocer d'un vistazu tolos autores del Surdimientu, con voces como la de Xuan Bello, Marta Mori, Pablo Texón, Berta Piñán, Antón García, Lourdes Álvarez, Xuan Xosé Sánchez Vicente, Nené Losada, Diego Solís, Raquel F. Menéndez...
Con ello, son hasta 131 los nomes d’homes y muyeres qu’apaecen nesta antoloxía de poesía asturiana que recueye, amás, información de los y les ganadores de premios de poesía n’asturianu de los 50 años últimos y que supón la mayor antoloxía de la lliteratura asturiana.
La novedá editorial, que lleva un entamu del escritor y académicu Inaciu Galán, va tar nes llibreríes nos próximos díes al preciu de 18 euros y bien llueu van dase anuncia de les primeres presentaciones, onde van intervenir dellos y delles de les autores presentes na obra, buscando xenerar con ello un homenaxe a la lliteratura asturiana del Surdimientu, percorriendo Asturies a lo llargo de los vinientes meses y coincidiendo col 50 aniversariu de la nacencia de Conceyu Bable.