«Tolo demás, caxigalines que diría la mio güela», comentó enantes d'asistir a una mesa redonda que se celebró nel marcu de la xornada conmemorativa
15 mar 2024 . Actualizado a las 12:13 h.El presidente del Gobiernu asturianu, el socialista Adrián Barbón, afirmó esti xueves que'l meyor reconocimientu a Conceyu Bable ye aprobar la oficialidá, polo que pidió al restu de grupos parllamentarios con representación na Xunta Xeneral qu'aprueben esi marcu llegal pal asturianu y pal gallego-asturianu.
«Tolo demás, caxigalines que diría la mio güela», comentó en declaraciones a los medios n'Uviéu enantes d'asistir a una mesa redonda que se celebró nel marcu de la xornada conmemorativa 'Xorrecíes tán les manes. Mediu sieglu de Conceyu Bable na perpectiva de l'Academia de la Llingua Asturiana', na Biblioteca d'Asturies Ramón Pérez de Ayala.
Un actu que según el presidente supón «un reconocimientu del conxuntu de la sociedá asturiana y del Gobiernu del Principáu» a Conceyu Bable y a tlo que supunxo «de tresgresor naquel momentu nel qu'había munches oportunidaes de cambiu n'Asturies«». En xeneral, esplicó, pal conxuntu de muyeres y homes que «foron claves pal empoderamientu de la nuestra llingua».
En xunu de 1974 la revista Asturias Semanal publicaba una entrevista a tres mozos universitarios, Xuan Xosé Sánchez Vicente, Xosé Lluís García Arias y Lluís Xabel Álvarez, que facíen una llamada d'atención a la sociedá asturiana contra'l complexu d'inferioridá rexonal y pidíen la defensa de la llingua asturiana como un bien cultural, la so presencia nos medios de comunicación y na escuela, y la creación d'una lliteratura y d'un públicu pa ella.
En payares de 1974 la mesma revista entamaba una sección baxo'l nome 'Conceyu Bable', de la que se responsabilizaba'l Grupu CB, primero quincenal y ensiguida selmanal, que se mantuvo hasta'l pieslle de la revista, en xunu de 1977. Neses páxines ta l'empiezu d'un llabor de dinamización social que foi más allá de la reivindicación llingüística, sirviendo como puntu d'inflexón al empiezu de la Transición.
L'autonomía y los símbolos que la identifiquen, como la bandera o l'himnu, les distintes facetes de la música asturiana (la gaita, l'asturianada, el cantar d'autor...), el deporte tradicional, el quesu o la sidra tuvieron na xente de Conceyu Bable los grandes impulsores; pero la so principal contribución foi llograr que se diera un pasu novedosu alredor de la llingua asturiana: de ser un atributu identitariu o un elementu patrimonial a conformar un valor absolutu capaz a xenerar una nueva identidá social. La campaña 'Bable nes escueles' que promovió llevó esi lema hasta los últimos rincones d'Asturies, informa Europa Press.