La conseyera de Cultura respondió esti martes a çJové que son los asturianos los qu'han de dicir cuál ye
20 feb 2024 . Actualizado a las 16:15 h.La conseyera de Cultura, Política Llingüística y Deportes del Gobiernu asturianu, Vanessa Gutiérrez, respondió esti martes a Vox que son los asturianos los qu'han de dicir cuál ye la so llingua materna.
«Arrógase usté dicir que la llingua del cien por cien de los asturianos ye l'español y siento dici-y qu'eso van ser los asturianos los que lo han de dicir», respondió Gutiérrez a una entruga del diputáu de Vox, Javier Jové, nel plenu de la Xunta Xeneral.
Asina, Gutiérrez señaló que los asturianos tán pronunciándose sobre eso nes encuestes sociollingüístiques que se tán realizando. En concreto, refirióse a la última, ellaborada pola Academia de la Llingua, y na que'l 63% de les persones encuestaes n'Uviéu, Xixón y Avilés, manifestaríen que-yos gustaría que los sos fíos pudieren dominar l'asturianu y el 96% diría qu'aspira a un futuru billingüe p'Asturies.
«Namás hai qu'escuchar a los asturianos pa saber lo que piensen y en qué llingua piensen», dixo la dirixente asturiana na so primer intervención nuna sesión de control al Gobiernu nel plenu de la Xunta.
Gutiérrez animó a participar nel Día Internacional de la Llingua Materna, que se conmemora'l 21 de febreru, con un programa d'actividaes culturales n'Uviéu, Xixón, Corvera y Teberga, amás de la publicación de materiales pedagóxicos que tán yá a disposición de la comunidá educativa nel portal Educastur.
Javier Jové, sicasí, afirmó que l'español ye la llingua materna del 100% de los asturianos y dixo que'l Gobiernu asturianu «la esclúi» na conmemoración y nos actos de celebración del Día Mundial de la Llingua Materna.
«Nun existe l'español pa ustedes. Pa ustedes, l'español, la llingua materna de los asturianos, nun merez nenguna reconocencia'l día que se conmemora'l Día Mundial de la Llingua Materna», llamentó'l diputáu de Vox, reprochando al Executivu que namás entamara actividaes «en llingua»; informó Europa Press.