En 2022 el SADEI cifraba en 68.000 el númberu d’habitantes de la cuenca’l Nalón. Nesi sen, podemos asumir qu’eses casi setenta mil persones son, en sí mesmo, potenciales usuaries de dalguna de les trés víes que vertebren esa cabecera del valle: la llínia de cercaníes C5 que parte dende la Pola Llaviana y fina en Xixón, la llínia C2 que conecta la estación de L’Entregu cola capital asturiana y, en tercer llugar, el tramu de la carretera AS-117 conocíu como’l Corredor del Nalón.
A vista de páxaru o analizando en detalle un mapa, ún puede llegar a pensar que vivimos na fastera d’Asturies (ciudaes aparte) que meyores víes y opciones de movilidá tien. Pero la realidá, como bien sabemos les vecines y vecinos d’esti valle hulleru, ye bien distinta. L’abandonu permanente de les dos víes de ferrocarril que tantu puxu apurrieron nel sieglu XX son güei, en plenu XXI, una alternativa nada afayaíza. De la vieya FEVE poco podemos dicir que nun se tuviere dicho yá. Como exemplu ehí sigue, La Felguera, a l’altura Valnalón, abierta en canal cuanta yá a la espera de ciruxana o ciruxanu que la suture. Y la RENFE, algo más confortable y puntual, entama a ser un quiero y nun puedo. D’ehí que, la única alternativa real en cuantes a tiempu y confort pa la movilidá acabe siendo la carretera de brea que cuerre paralela al vieyu ríu Nalón. ¿Cómo nun va tar conxestionada y saturada? Faigamos númberos: si cuerren 22.000 vehículos al día pel Corredor del Nalón, la calculadora podría amosar el resultáu de que per esa ruta circula un coche cada 3,9 segundos. Más que conxestión, podríemos falar de saturación. Y la saturación siempre convierte en más peligrosa y insegura cualesquier vía.
Agora siéntese falar de medianes, de radares, d’aminorgar velocidaes, de desdoblar carriles… Y claro, tolo que seya aumentar la seguridá d’esa carretera bona cosa ye. Pero poco y con mui escasu enfotu se fala de convertir a un porcentaxe significativu d’esos 22.000 vehículos n’usuarios frecuentes de les llínies C5 y C2 de cercaníes. De mano, fadría falta invertir nesos dos ferrocarriles: aumentar frecuencies, suprimir pasos a nivel, aminorgar los tiempos de trayectu, etc. Anque pa ello qué bien sedría qu’Asturies tuviere algo que dicir sobre la so rede de ferrocarriles. Porque si tovía dalguién nun lo sabía, l’Alministración asturiana nun tien nenguna competencia sobre los trenes que se mueven dientro del so territoriu. Cero. Ehí ta’l gran problema: tolo que tenga que ver con invertir nel ferrocarril d’Asturies, esi que tien la misión de mover a la xente que va y vien de trabayar día a día, o a estudiar, o a esparder, o a visitar a un familiar, vete y negócialo en Madrid. Y llueu, fíate y espera.
Porque la solución más completa y la que realmente tien una visión de país, cohesionadora, de futuru y qu’aporta soluciones al retu de la sostenibilidá que’l sieglu XXI nos ta poniendo enriba la mesa ye precisamente esa: más y meyor ferrocarril pa movenos nel día a día. ¿Tan útopico ye esixir tener, polo menos, un tren ca 30 minutos que conecte los conceyos mineros coles ciudaes d’Asturies? ¿Tan utópico ye dir plantegando progresivamente la supresión de los pasos a nivel que frayen les villes, volviéndoles más insegures y que ralenticen los servicios? ¿Tan utópico ye pensar que’l tren d’Asturies se pueda xestionar dende l’alministración asturiana? Mentanto, que sigan animándonos a dar palmes a los cada vegada más y más turistes que lleguen a Asturies y que se van mover, como nun pue ser d’otra manera, en coche, peles yá afogaes carreteres asturianes. Anque claro, culpa nun tienen esos visitantes. Porque otra alternativa, nesti momentu, nun la hai.