Iniciativa pol Asturianu tresllada a la nueva presidenta de Paradores el valor cultural d'usar la llingua asturiana

Iniciativa pol Asturianu solicitó formalmente a Paradores la incorporación de la toponimia tradicional asturiana a los nomes de los tres establecimientos colos que la sociedá pública cuenta en Asturies. Ye una de les propuestes que la organización de reivindicación llingüística acaba de treslladar a la nueva presidenta de la entidá, Raquel Sánchez, al traviés d’una carta, na que tamién se fai referencia a la traducción al asturianu de la páxina web de la rede hotelera y la incorporación de volúmenes nes llingües propies de la comunidá a les biblioteques d’estos equipamientos.

La organización considera que la presencia del idioma permitiría da-y normalidá, visibilidá y reconocimientu a la llingua asturiana a les persones que lleguen a Asturies y s’agospien nos Paradores de la comunidá. Amás, la entidá recuerda que la presencia de les llingües propies dentro de los equipamientos podría resultar interesante y enriquecedor pa estos hospedaxes. «La llingua asturiana xenera imaxen de marca a nivel comercial y turísticu. El patrimoniu cultural del altor d’un idioma ye un elementu clave pa dase a conocer nel mundu y ser atractivos al visitante», recueye la carta.

Iniciativa pol Asturianu recuerda que los conceyos onde s’asitien los tres Paradores asturianos, Cangues d’Onís, Xixón y Cangas del Narcea, yá tienen la toponimia tradicional aprobada, pero que la sociedá pública nun los emplega. Hai que recordar que la entidá pública sí fai usu de la toponimia oficial d’otres comunidaes con llingua propia como ye’l casu de Galicia (Costa da Morte), País Vascu (Hondarribia) y Cataluña (La Seu d'Urgell).

Na carta remitida, la entidá tamién propón incorporar l’asturianu na rotulación interior de los Paradores, la traducción de la páxina web a esta llingua, asina como ufiertar a los visitantes la posibilidá de disfrutar d’obres lliteraries n’asturianu y eonaviegu nes biblioteques d’estos agospios. Estes iniciatives podríen consiguise fácilmente mediante la collaboración col Gobiernu del Principáu d’Asturies, l’Academia de la Llingua Asturiana y la Rede de Biblioteques.

Iniciativa pol Asturianu ye una asociación ensin porgüeyu económicu que nun recibe ayudes nin sovenciones públiques. Llevamos más d’una década trabayando pola normalización social de les nueses llingües y pol reconocimientu de los drechos llingüísticos de los sos falantes. Trabayamos p’algamar espacios de normalidá pa la llingua asturiana, al traviés d’acciones concretes que mos permitan llegar a alcuerdos con entidaes de toa triba que supongan afitar l’usu del asturianu n’ámbitos nuevos. D'igual manera, buscamos consensos y alcuerdos sobre l’usu del asturianu, faciendo usu de campañes reivindicatives nes situaciones nes que ye necesario.

---

---