El Principáu reconoz el baille de la xota como parte del patrimoniu inmaterial d'Asturies
AGORA
El BOPA publicó la resolución pola que s'inclúi nel Censu el baille «a lo suelto» típicu de la rexón y la tradición de les alfombres florales
26 ene 2024 . Actualizado a las 17:53 h.El BOPA publicó la resolución pola que s'inclúi nel Censu del Patrimoniu Cultural Inmaterial d'Asturies el baille de la xota «a lo suelto» típicu de la rexón, onde les pareyes baillen cara a cara, ensin tocase.
El testu reconoz como portadores d'esti patrimoniu a les persones que la baillen, yá sían de grupos de baille tradicional, agrupaciones folclóriques o les persones independientes que participen nes Nueches en Danza, amás de les persones mayores que baillaron na so mocedá y que tresmitieron esti patrimoniu a les xeneraciones nueves.
Per otru llau, reconozse lo que supunxo pa esti baille'l procesu de recuperación de la cultura asturiana lleváu alantre dende la Transición pa llegar a la corriente neuva de revitalización de les tradiciones a partir de la pandereta --elementu que se reconoz vinculáu a les muyeres y a les minoríes LGTBI-- y el baille.
Amás, tamién se reconoz el patrimoniu llingüísticu que representa al haber lletres de xotes nes trés llingües usaes n'Asturies --asturianu, gallego-asturianu y castellanu--, amás de los elementos performativos qu'acompañen el baille, como los instrumentos, la indumentaria, l'allugamientu de los baillarinos o l'espaciu nel que se realiza.
La resolución define la xota como un baille que nació como una manera de diversión de les clases populares y que pasó a constituyise actualmente como un referente identitariu que tien que caltenese y tresmitise a les xeneraciones nueves.
Too eso hasta llegar a les actuales Nueches en Danza, onde'l baille tradicional vuelve al so orixe de ser un elementu de socialización pa la mocedá asturiano, entamándose amás de manera autoxestionao pa contribuyir a salvaguardar y preservar esti patrimoniu.
Alfombres florales
Per otru llau, el BOPA tamién publicó la resolución pola que s'inclúi nel Censu del Patrimoniu Cultural Inmaterial d'Asturies la tradición de les alfombres florales n'Asturies.
El testu reconoz amás el procesu comunitariu que representa la so ellaboración, al tar realizáu por asociaciones y grupos de vecinos de manera desinteresada.
Trátase d'una manifestación d'arte efímero vinculao, sobremanera, a la festividá relixosa del Corpus Christi, nes que s'alfombren les cais que percuerren les procesiones.
Anque se realiza en dellos llugares d'Asturies, destaquen les de Castropol --declarada como Fiesta d'Interés Turísticu Rexonal-- y Cué (Llanes), que se celebra na festividá de La Sacramental, informa Europa Press.