La iniciativa ta formando a especialistes que s'incorporen al proyectu
04 oct 2019 . Actualizado a las 19:52 h.El Fondu pa la Protección de los Animales Selvaxes (Fapas) llegó a un alcuerdu cola dirección del Voluntariáu Nacional pal Censu del llobu Ibéricu que se fai dende'l Departamentu de Ciencies de la Vida de la Universidá d'Alcalá, pa entamar n'Asturies un censu independiente que valore la población de llobos qu'hai nesta Comunidá Autónoma.
«Los censos de llobos n'España, son oxetu na actualidá d'una debate científicu porque, polo xeneral, realizáronse con metodoloxíes pocu fiables qu'ufiertaron cifres globales que na actualidá se cuestionen, pero que son utilizaos poles alministraciones públiques nos sos trabayos de xestión», según el Fapas.
La iniciativa que se fai dende la Universidá de Alcalá, creó una rede d'investigadores voluntarios qu'ufren al proyectu datos de campu, llograos con una metodoloxía científica y que fai un trabayu seriu sobre'l llobu.
N'Asturies, Fapas comprometióse a coordinar esti proyectu que yá tán realizando por voluntarios con esperiencia nel trabayu de campu. La iniciativa ta formando a especialistes que s'incorporen al proyectu y que deprenden les técniques de siguimientu y identificación de rastros de llobos.
Tola información del trabayu de campu almacénase a tiempu real nuna Web activa al traviés d'Internet que s'almacena na sede del proyectu na Universidá de Alcalá y que permite a los biólogos y especialistes ellaborar el Censu Nacional.