
El proyectu autoxestionáu ñació va 7 años con un perfil en redes ensin aspiraciones
20 jun 2025 . Actualizado a las 10:32 h.Inés ye la persona que ta detrás de La bixxa, un proyectu autoxestionáu, allugáu n'Asturies, qu'intenta xuntar el compromisu social cola creación artística al traviés del mundu natural, les relaciones interespecie y la puesta en valor de la necesidá del sofitu mutuu nesta sociedá cada vez más complexa, individualista y contraria. Ye esti un proyectu curiosu ya interesante de conocer y, pa ello, falamos cola so creadora.
—Conocemos la marca artística, con un estilu propiu bien reconocible que ye’l to sellu d’identidá, pero interésanos saber de primera mano: ¿Quién ye La Bixxa y a qué se dedica?
—La Bixxa ye una marca, y detrás d'ella toi yo, Inés. Esti ye un proyectu qu'empecé con 18 años (agora tengo 25). Nel so entamu nun yera más qu'un perfil en redes al que yo diba xubiendo los mios dibuxos, y ensin dame cuenta foi creciendo hasta lo que ye güei, un proyectu qu'aspira a convertise nuna forma de vida.¿A qué me dedico? ¡A munches coses! Agora mesmo la mio prioridá ye sacar esta marca alantre. Pero tengo otros munchos proyectos na cabeza pal futuru; como por casu una asociación cultural na zona rural onde vivo o un taller de serigrafía y risografía…y nun facer namás facer los mios diseños, sinón ponelo un poco a disposición de la xente de la redolada, les mios vecines y amigues.
—El to proyectu artísticu tá marcáu por un calter social y políticu mui definíu. Más que sólo una marca, la to propuesta ye una declaración de principios. ¿Cómo se plantega y se vive un proyectu asina dende l’autoxestión y l’apoyu mutuu?
—Bono, de mano esti proyectu nun naz cola motivación de xenerar beneficiu, y por eso nun me considero emprendedora. Ye un proyectu col que pretendo dar voz y visibilidá a temes que m'afecten, a mi y a la mio contorna. Con él busco repercusión social, concienciación, que sirva pa que la xente se sienta acompañada. Dar voz a lo que nos pasa per dientro y per fuera. Dende la mio esperiencia vital, el proyectu pasó, conmigo, per munchos contestos sociales distintos. Funcionó en distintes ciudaes, nel estranxeru, nel rural…y too gracies a la xente d'alredor, les mios vecines, les mios amigues, la mio familia... Sofitar nel apoyu mutuu, nos cuidos y n'apostar recíprocamente por otros proyectu conocíos, que creo qu'eso ye lo básico de l'autoxestión y el sofitu mutuu.
—Garramos una frase tuya que nos paez pernecesaria nos tiempos d’anguaño: «Porque una cosa nun quita la otra; la tenrura nun quita la rabia, la vulnerabilidá nun quita la fuercia». Esta dualidá ente la tenrura y la fuercia ye una cuestión mui actual, quiciás lo fue siempres pero caldía paez que se fala más d’ello nes cais y n’otros foros non tan avezaos a estos temes. Nesti tiempu d’individualismu y col avance del fascismu ganando y la crisis de la democracia tal cual la conocemos, ¿consideres que la tenrura y los cuidaos son revolucionarios?
—Totalmente. No que cinca a espacios políticos y movimientos sociales, diría qu'esta conclusión ye a la que llegué dempués de tar en dellos colectivos. Hai qu'abrazar la vulnerabilidá de cada persona, y curiar como la xente ta nos espacios, qué necesidaes hai pa que todes podamos sentinos agusto, dientro de lo que se puede, y como colectivu tamién poder facer autocrítica y entender qu'hai espaciu pa los erros, nun facer de policíes unos con otros. Y no que cinca a la contorna social, familia, amigues o xente desconocío nes cais…diría que ye lo único que nos queda. Que nesta vida que se siente tan contraria, coles condiciones de vida nes que tamos: la vivienda, salarios, esplotación llaboral, crisis migratoria, fascismu nes cais, ultraderecha ganando terrenu, transfobia y fobia polo xeneral al colectivu lgtbiq+ (o flinta*)…quédanos facer trinchera, un llugar afayadizu onde recoyese, un abrazu, un acompañamientu cuando hai que facer coses difíciles, compartir los cuidos, anque nos enseñaren qu'había que poder con too soles…un platu de comida caliente, un techu onde abellugase cuando te quieren deportar…sofitu a los colectivos en fuelga, nun dexar de falar y presionar sobre los xenocidios televisaos…son curiaos y son revolucionarios.
—Los tos diseños, especialmente en ropa, amiesten la dureza gráfica del estilu punk más clásicu con una mena d’imaxinería de la tenrura qu’aprosímase a tendencies más cuquis. Esta mestura tan bien consiguida empata dafechu cola to propuesta de «dinamita y sororidá». ¿Trátase d’un estilu buscáu arrémente como mecanismu de concienciación o ye la confluyencia natural d’estos dos conceptos vertebrales a la to propuesta?
—Diría que ye un reflexu de lo que soi, y de lo que ye Labixxa. La dureza como coraza que protexe daqué mui blandino nel interior. Que siento que no fondero ye un poco lo que tenemos toes. Una coraza que, d'un mou o otru, abellúganos de tolo que nos vien enriba. Hai que velo tamién con cierta fondura. Una vegada, nun mercáu, unes señores pararon a comentar ente elles la so opinión sobre una de les mios ilustraciones y escuché-yos dicir que «protexer la suavidá» con pinchos yera incoherente. A mi fíxome muncha gracia'l comentariu y pensé, «como la vida mesma, ¿non?». Les dos coses pueden convivir y, ello ye que suelen convivir: Que dende lo punk nos acostumemos a nun ver la vulnerabilidá como una debilidá, y que dende lo suave, dende los cuidos y la tenrura, nun pensemos que nun hai espaciu pal enfadu y la rabia. Nun hai emociones meyores o peores; a lo último, l'enfadu apaez pa protexenos de coses que corporalmente entendemos como una amenaza. Qué menos que, dende la tenrura, abrazar eso como daqué pervalible.
—Los mensaxes que promueves col to arte non sólo xiren al rodiu de los cuidaos en sentíu ampliu, sinón que propones pieces esplícitamente dedicaes a la responsabilidá afectiva, lo queer, la sororidá, el cuidáu del mundu rural, la llucha contra la especulación urbanística y otres lluches sociales. Ye evidente que yes una persona comprometida. ¿Hai dalguna cuestión social qu’entá nun tengas tocao col to arte y que tengas pruyimientu de tratar?
—¡Uffff, un montón! Siento que voi sensibilizándome y, con eso, voi dibuxando porque ye la mio forma de procesar y d'espresar lo que tengo dientro. Ye verdá qu'hai cuestiones que me toquen más de cerca qu'otres, pero hai munches lluches sociales coles que nun tengo entá tanta cercanía o información, pero si lo tengo en mente; como la oficialidá de les llingües, la recuperación de la tradición popular, el antiadultismu, la antipsiquiatría…
—Nun planu más puramente artísticu, vemos que faes camisetes, llámines y hasta diseños pa tatuaxes. Cuéntanos un poco del to procesu creativu: ¿qué fai surdir la idea pa un diseñu nuevu y cómo se desendolca esa idea hasta llegar a ser una obra o un productu acabáu?
—Depende munchísimo. Dacuando, tengo un tema rondándome mientres un tiempu hasta qu'atopo la manera d'espresalo en papel. Dacuando, cueyo'l lápiz ensin saber bien de lo que quiero falar y va coyendo forma'l dibuxu en sí mesmu. Dacuando ilustro y dempués espero a ver qué me recuerda lo que dibuxé… Pero la mayoría de les vegaes dibuxo a partir d'un tema que me ta tocando especialmente nesi momentu, que me remueve o remueve a daquién cercanu. A partir de conversaciones coles mios amigues, o temes que trato en terapia, cantares qu'escucho, o dalgún podcast…
—La progresión artística ye distinta en cada casu y hai xente qu’atopa’l so formatu ideal y dedícase a trabayar en busca del perfeccionamientu estilísticu, desendolcando y profundizando nes sos idees mientres el procesu; otres persones tán constantemente camudando técniques y estilos, faciendo del cambiu la so seña d’identidá. Tamién hai artistes de métodu y rutina y artistes más d’inspiración pasaxera… ¿Cómo te definiríes tu, como artista?
—Funciono abondo con inspiración pasaxera. Anque sí considero que tengo un estilu reconocible, nesti momentu toi aprendiendo y esplorando munches coses, nun plantego zarrame nun solu estilu.
—El tuyu ye un arte comprometíu que busca remover conciencies. ¿Consideres que la to obra ta al serviciu del mensaxe? ¿Paezte que la reflexón ética ye una función o un deber del arte?
—Pa mi, ye inevitable. Tolo que faigo lleva detrás hores y hores de cuestionamientu, pensamientu y sentimientu. Dacuando inclusive desearía que non, y facelo d'una manera más llixera, pero a cencielles nun ye lo que me sale. Ye lo que toca cuando crees sobre los cuidos. Inclusive cuando ilustro pa eventos, o m'entren proyectos de fuera, intento que seya lo más inclusivo y respetuosu posible; fáigolo siendo consciente de la responsabilidá que tengo dientro de la creación o manexu de recursos que conformen l'imaxinariu colectivu, y con cuidu de les simboloxíes qu'uso. Por eso mesmo, al mio pensar, la reflexón ética ye un deber del arte ¡Anque esto ye un gran alderique, que lleva abiertu muncho tiempu dientro del mundu artísticu!
—Prestaríanos conocer la to opinión tocantes al debate sobre si ye conveniente separtar la obra de la persona o si obra y autor/a han considerase como indisociables. ¿Paezte adecuáu’l plantegamientu?
—Bono, esti ye un alderique eternu dientro (y fuera) del mundu artísticu, pero la mio postura ye clara: nun pueden estremase. Nel nuesu contestu social y hestóricu, puede paecer qu'esti alderique tien sentíu; sicasí, al mio pensar, nun tendría d'esistir. L'arte ye una forma d'espresión, daqué personal de cada unx, y depende totalmente del contestu, social, hestóricu, políticu, económicu, y de la educación y el contestu familiar que la persona tuvo. Nun puede estremase al artista y tol so backround, de la obra que produz; obra que tamién recibe influencies del llugar xeográficu nel que s'atopa, de les persones coles que se rellacionaba o se rellaciona, de la corriente artística del momentu, de les coses que lu mueven, d'onde s'asitia políticamente o de si polo menos lo fai…
—Pa zarrar esta entrevista vamos pidite que mos fales de dalgún referente artísticu o cultural que te preste especialmente y consideres que pague la pena mencionar. ¿Dalguna recomendación que quieras compartir coles llectores?
—Tengo munchísimos de referentes, agora ye mui fácil tener accesu al arte de munches persones al traviés de les redes sociales, ¡y conocí al traviés del activismu a muncha xente que m'inspira na mio día ente día! Dalgunes de les persones que m'inspiren y sírvenme de referencia son: Barbara Kruger, Nan Goldin, Dacal, Micha Huigen, Camicolor, Rubén Hervás, Mark Conlan, Caos Ilustrado, Lafat, Cristina Daura…