La IX Quedada BTT Solidaria San Martín de Luiña prepara una edición nueva peles brañes vaqueires
AGORA
La prueba deportiva non competitiva, que se celebra esti sábadu, va donar tolos alimentos non perecederos recaudaos a los Servicios Sociales del conceyu de Cuideiru
11 sep 2024 . Actualizado a las 12:13 h.La Quedada BTT Solidaria San Martín de Luiña celebra esti sábadu 14 de setiembre la so novena edición de una prueba non competitiva que ye yá una data fixa nel calendariu ciclista asturianu. Nesti casu, la organización repite percorríu, del que los participantes aseguren sentise encantaos pola guapura de les vistes, pol bon estáu de los caminos y pol bon facer de la organización na so llimpieza y señalización.
Esta prueba deportiva non competitiva ñació va yá diez años pol empeñu del presidente de l'asociación deportiva Quedada BTT San Martín de Luiña - Dai Biela, Alexis Riesgo, que quixo dar una vida deportiva al pueblu mientres les fiestes patronales n'honor a la virxe de Los Dolores. Pa ello, pensó en recuperar de dalguna manera la clásica carrera infantil que nos años 90 se celebraba na parroquia y pela que pasaron dellos ciclistes que poco depués diben trunfar nel pelotón ciclista internacional. D'ello diba salir l'actual Quedada BTT, al que-y quixo añedir un calter solidariu, pol cual ha donase a lo menos un quilu d'alimentos non perecederos pa participar nella. Una donación que supera siempre los 300 quilos y que se destinen a los Servicios Sociales del conceyu de Cuideiru, onde se celebra esta prueba ciclista.
El percorríu, adaptáu pa tolos niveles, ye de 33 quilómetros y va facer viaxar a los participantes pelos caminos del conceyu hasta les brañes vaqueires de la Sierra del Pumar y de los vientos, pasando per llugares como'l picu Llan de Cubel o llocalidaes como Brañaseca, hasta rematar nel mesmu puntu de salida, el centru de Samartín de Lluiña, bien llueu de la ilesia parroquial. Les inscripciones, que van tar abiertes hasta esti vienres a les 17:00 hores na plataforma Empa-t, incluyen amás de la propia participación na quedada una espicha al rematar el percorríu, un regalu conmemorativu que nesta edición va ser una gorra y la participación nel sortéu de más de 60 productos donaos poles entidaes que colaboren nel eventu.