Esta iniciativa busca promover la creación de conteníu cinematográficu nes llingües propies d'Asturies
14 ago 2024 . Actualizado a las 12:49 h.La Conseyería de Cultura publicó nel BOPA de güei una de les mayores novedaes no que cinca a los premios que concede l'órganismu gubernamental. Trátase del I Premiu de Guion Cinematográficu n'asturianu o eonaviegu o gallego-asturianu. D'esta manera, ábrese un camín nuevu pal asturianu, con una iniciativa nueva que busca promover la creación de conteníu cinematográficu n'asturianu.
Los interesaos nesti premiu van poder presentar guiones orixinales ya inéditos en llingua asturiana o eonaviegu o gallego-asturianu pa llargometraxes de ficción o animación. Nun se van almitir los guiones que seyan adaptaciones d'obres del mesmu autor o autora o d'otros o otres autores, nin tampoco adaptaciones lliteraries. Amás, los guiones orixinales ya inéditos que se presenten nun van poder rodase enantes de la convocatoria que regula'l premiu.
La Conseyería va poder alcordar col autor o autora del guion premiáu la publicación n'esclusiva de la primer edición del testu premiáu (que va poder ser en formatu dixital) na que figure'l premiu y l'añu de concesión, dando por retribuidos col premiu los derechos d'autor de la primer edición. De nun publicase a lo llargo del añu siguiente al de la convocatoria na que resultara ganador, la persona galardonada va poder disponer de la obra pa la so publicación nos términos qu'esta determine faciendo mención espresa a que'l testu llogró'l Premiu de Guion Cinematográficu en llingua asturiana.
El documentu espublizáu nel Boletín nun confirma, eso sí, la dotación económica que va llevar esti premiu de nueva creación, anque sí remarca que, amás d'un troféu, la producción audiovisual ganadora va incluyise directamente nos circuitos culturales que se programen dende'l Gobiernu d'Asturies.