Intelixencia artificial, la propuesta pa evitar l'afluencia masiva a les sableres asturianes

El Gobiernu d'Asturies trabaya nun plan p'ameyorar la movilidá nes zones costeres, especialmente mientres la temporada alta turística, cuando la visita de los turistes a les sableres xenera desafíos significativos de tráficu y aparcamientu.

Esti proyectu integral, qu'inclúi l'usu de tecnoloxíes avanzaes, nueves normatives y la creación d'un ximielgu dixital del territoriu, busca optimizar la esperiencia de residentes y turistes, garantizar la seguridá vial y promover la sostenibilidá ambiental.

Pa ello, dende la Conseyería de Presidencia, Retu Demográficu, Igualdá y Turismu trabaya en delles iniciatives:

Optimización del tráficu y xestión del aparcamientu. Al traviés de la regulación d'aparcamientos y l'identificación de vehículos por aciu tecnoloxíes de sensores y cámares, va buscase ameyorar la circulación nes víes d'accesu a les sableres y asegurar un usu eficiente de los espacios.

Información en tiempu real y seguridá vial. Tán instalándose sensores en túneles y víes d'alta capacidá pa monitorizar el tráficu y aumentar la seguridá. Amás, al traviés de mupis dixitales va apurrise información actualizada sobre les condiciones del tráficu y la disponibilidá d'aparcamientos, facilitando asina la planificación de los desplazamientos.

Fomentu de la sostenibilidá. El plan inclúi midíes p'amenorgar l'impactu ambiental del tráficu, promoviendo l'usu del tresporte públicu y ameyorando la xestión de recursos al traviés de tecnoloxíes avanzaes.

Unu de les pilastres fundamentales d'esti proyectu ye la creación d'un ximielgu dixital, una representación virtual del territoriu d'Asturies que va dexar una xestión más eficiente de la movilidá. Esta innovadora estratexa, que yá ta en marcha, va integrar diverses iniciatives tecnolóxiques como la sensorización de túneles, la dixitalización de carreteres y la instalación de redes pa la comunicación de datos en tiempu real.

---

---