L'asociación, fundada en 2020, entama de contino actividaes como senderismu, espeleoloxía, running, pádel y patinaxe, amás d'eventos culturales y educativos.
28 jun 2024 . Actualizado a las 13:46 h.El Gobiernu d’Asturies concedió’l sellu Arguyu de Deporte Asturies a l’asociación Faciendo Camín reconociendo asina’l so llabor exemplar en defensa y promoción de los derechos de les persones LGTBI al traviés del deporte.
El distintivu que reconoz a les entidaes deportives que fomenten la inclusión plena del colectivu LGTBI, Arguyu de Deporte Asturies, va entregase a Faciendo Camín na celebración de la Gala del Deporte Asturianu d’esti 2024, promoviendo asina la visibilización de la diversidá que tien el sector deportivu asturianu.
L’asociación Faciendo Camín, fundada nel 2020, medró rápido hasta convertise nun referente na comunidá LGTBI, ufiertando un entornu seguru y llibre de discriminación pa la práctica del deporte. Amás, Faciendo Camín forma parte del Observatoriu contra la LGTBIfobia impulsáu pol Gobiernu d’Asturies, y tamién participa nel grupu de trabayu creáu pal desenvolvimientu de la llexislación en materia LGTBI autonómica.
Con aproximao 70 persones asociaes, l’asociación entama de contino actividaes como senderismu, espeleoloxía, running, pádel y patinaxe, amás d’eventos culturales y educativos. Ente estos últimos tán los talleres de cerámica o l’Alianza Lliteraria. Toes estes actividaes tuvieron un impactu significativu na sociedá asturiana, fortaleciendo los llazos comunitarios y promoviendo la visibilidá del colectivu LGTBI n’ambientes tradicionalmente heteronormativos.
L’aumentu progresivu de la nómina de persones asociaes a esta organización demuestra’l so llabor exemplar, pero tamién la necesidá de desaniciar dafechu la LGTBIfobia y el machismu. Precisamente, esti ye ún de los oxetivos de Faciendo Camín que’l gobiernu premió cola concesión del distintivu Arguyu de Deporte Asturies.