La voz femenina amortayada

N’Afganistán, en plenu 2024, prohibióse la voz femenina en públicu. Per aciu la llei pal Espardimientu de la Virtú y la Prevención del viciu. Los talibanes, nel poder dende 2021, toguen a les muyeres falar, cantar, lleer y rellacionase nos espacios públicos, supuestamente pa que los homes nun caigan en tentaciones. Ye reforciar la llimitación de la llibertá d’espresión femenina, castigándoles a un silenciu obligatoriu.

Too ello col envís, dende l’ Emiratu Islámicu d’Afganistán, de la «promoción de la virtú y el desaniciu del viciu». Ye la interpretación más restrictiva de la llei islámica o xaría dende fai trés años, nos qu’algamaron el poder.

Amás de la obligación de vestir el velu integral o h.iyab y tarazar los drechos femeninos nos medios de comunicación, como incluyir imáxenes de seres vivos. Tamién prohíbe’l tresporte de muyeres adultes ensin un tutor masculín llegal. Les muyeres nun han mirar, nin xuntase, a los homes que nun tengan parentescu con elles. Tórgase-yos l’accesu llaboral y a la educación superior. 

Los castigos severos pol incumplimientu d’estes riegles tán reglaos. La policía de la moral tien la capacidá d’executalos. Ello, dempués de la quema de 15.000 intrumentos musicales «porque fomenten el viciu cola inmoralidá de la música». La ONX amosó’l so refugu a la violación de los drechos humanos sobre les muyeres, condergándola.

La XE y otros organismos sumáronse a la conderga, como nuevu pilancu pa la normalización de la comunidá internacional col gobiernu fundamentalista afganu. Trátase d’una persecución de xéneru, un crime escontra la Humanidá según la Corte Penal Internacional, a la que pertenez l’estáu asiáticu. Inmersu nuna grave cris humanitaria y socioeconómica con 28 millones de persones que riquen asistencia y 6 millones con fame, nun país de 42 millones d’habitantes.

Poro, afitó sanciones pola amenaza pa la paz, la estabilidá y la seguridá d’Afganistán: embargu d’armes, prohibición de viaxar ya inmovilización d’activos. Too paez poco al llendase la llibertá de la metada de la población d’esi país.