Billingüismu y turismu: Baleares y Asturies

Hai un billingüismu fluyíu ente’l catalán y el castellanu. Los baleares falen na so mayoría catalán ente ellos y castellán colos turistes de la Península. Reciben perbién una rempuesta o una entruga na so llingua pero son quien a camudar de llingua en función de a quien se dirixa la conversa.

El panorama institucional ye’l catalán, asina como’l de la mayoría de la cartelería comercial. El tratu ye peramable y l’ambiente natural mui agradable. Sacante’l clima de los caberos branos emburriáu pol cambéu climáticu que provoca foles de calor.

El cambéu de gobiernu tres les eleiciones autonómiques de 2023 arreyó’l desaniciu de la Direcció General de Política Lingüística lo que supunxo un retrocesu na xera de normalización social del idioma propiu, al que siguirán probablemente otres midíes empobinaes al afitamientu del castellanu como idioma dominante nel archipiélagu balear. Un 60% de los baleares fala bien el catalán énte un 94% que fala bien el castellanu (2022).  El primer idioma ye cooficial y compartíu por 10 millones de persones. Aportó a les Islles Baleares nel sieglu XIII mientres que’l castellán entamó una lenta sustitución llingüística de magar el sieglu XVI.

Anque los baleares se faigan entender también n’inglés, francés y castellanu pola altísima cantidá de turismu internacional que reciben. Pesie a los planes del nuevu gobiernu pa desaniciar el modelu d’inmersión llingüística qu’afita un mínimu del 50% les clases en catalán, anque na práutica tea nel 100%. Y que tampoco nun seya riquíu pa trabayar na alministración.

L’asturianu fálase nuna fastera que se punxo de moda nos caberos años pol so clima y valores naturales. Recibe también una pequeña parte de turismu llingüísticu, sobre manera de catalanes y vascos. Pero nun hai oficialidá, nin programes específicos pa esta triba de turismu, nin planes efeutivos de normalización social en xeneral. 

Amás, en delles llocalidaes la situación empeoró tres l’algame pola estrema drecha de delles cuotes de poder conceyil nel país. Nesi sen fai falta mirar otres realidaes llingüístiques como espeyu pa los pasos qu’han siguise nun futuru.

No que cinca al turismu y la masificación, rescampla que Menorca ye’l llugar onde caltuvieron la natura y la tradición pa torgar lo que pasó na Mallorca sobreesplotada. Asina y too, ye con Asturies el llugar de vacaciones más demandáu del Estáu. Ente les midíes que s’alcuentren tán el respetu poles viviendes tradicionales, llendes de velocidá nes carreteres y los aparcamientos llimitaos a les cales, que se piesllen al completar l’aforu. Anque la masificación sigue, tenten d’amenorgala y faen protestes cíviques escontra la xentrificación que carecen en toles islles baleares. 

N’Asturies ye un fenómenu recién, pola mor d’un más agradable ambiente climáticu de calter atlánticu. Pero nun hai infraestructures afayadices, como reconoz la patronal del ramu. Y monumentos y fasteres naturales tán lliteralmente invadíos nes époques vacacionales. Regular les tases turístiques y la cadarma en xeneral ye un retu pa esti país. Nun ye un bon plan caltener espacios de xestión pública pa un usu priváu del turismu masificáu.