Europa nun ye América

Hai diferencies de toa triba ente dambos los dos. D’esta miente, na Xunión Europea hai 450 millones d’habitantes y nos Estaos Xuníos d’América 330. Na XE hai 27 estaos miembros y nos EE.XX. 50.

No que cinca a los idiomes, Europa tien la mayor diversidá llingüística y cultural del mundiu. La XE tien 84 idiomes propios, 24 idiomes oficiales y trés «de procedimientu»: inglés, francés y alemán. Anque ye dos vegaes menor que los EE.XX. Que nun tienen idioma oficial, anque de facto seya l’inglés mientres que l’español ye’l segundu más faláu y ta reconocíu en dellos estaos. L’Estáu Llibre Asociáu de Puertu Ricu tien l’español como primer llingua oficial per delantre del inglés.

Dende Primaria depréndense dos o cuatro idiomes estranxeros (y rexonales) de mou obligatoriu n’Europa. Los estauxunidenses namái falen l’inglés (y la so llingua materna si son inmigrantes).

Tamién hai diferencies nel planu xeopolíticu. Asina mientres la OTAN almite a Suecia y Finlandia como nuevos miembros y quier arrodiar a los sos rivales con bases militares, los sos aliaos busquen una «Autonomía estratéxica europea» que-yos dea un papel como ñúcleu nel multillateralismu que nagüen. D’esta miente entamen a surdir voces que vindiquen una Europa más xunida ya independiente del siguimientu que tien agora de la OTAN y los norteamericanos. La guerra n’Ucraína ta desgastando l’autonomía y les fuercies europees escontra l’invasor rusu al empar que xube’l so gastu militar. 

Pero también alloña a los europeos de texer víes de comerciu, culturales, etc con China. Rival económicu de los EE.XX. que nun quieren perder l’antigua hexemonía mundial que teníen tres la Guerra Fría. O torguen aidar a Palestina, como nel casu d’almitila como un estáu de plenu drechu, como afita la mayoría absoluta de la ONX.

Europa tien de garrar más autonomía de los americanos si quier reinventase como actor mundial. Poro, los americanos presionen pa qu’ello nun asoceda. Alemaña y Francia yá nun formen una exa qu’empobine al vieyu continente, agora sumíu nun siguimientu dafechu de Bruxeles de les polítiques marcaes por Washington. 

Hai d’esconsonar, porque los estaos cuasi federaos que formen la XE nun puen dexar la so defensa, ente otres materies, nes manes d’un poder militar dirixíu dende otru continente.

N’otros planos, como l’económicu, políticu, relixosu, y militar, tamien hai diferencies ente dambos bloques. Europa nun ye América, y nun val ser aliaos pa siguila militarmente ensin autonomía colos sos determinos. La Europa de los drechos humanos ha recuperar la so entidá, énte los que quieren desfacer siete décades d’alcuerdos y convivencia pacífica ente’l conxuntu los estaos que la conformen.