Prudencia na Xunión Europea ma non troppo

Qu’una muyer llogre por primera vegada ser la ministra d’Italia ye mui bona noticia. La mala noticia ye que Giorgia Meloni, pese que reconoz que la sociedá italiana ye mui machista, nun apueste pol feminismu y dea’l llombu a la igualdá ente homes y muyeres. Nel mitín de Marbella nel que participó xunto a Vox dixo que la ideoloxía de xéneru busca la desapaición de la muyer. Asina que nun choca que p’asonsañala dos disc-jockeys punxeren música a una de les sos conseñes: «yo soi Giorgia, soi una muyer, soi una madre, soi cristiana», llogrando facela famosa y que’l cantar se baillare en toles discoteques italianes.

¿Cuáles fueren les causes d’esta clara victoria depués de qu’en 2018 el partíu de Giorgia Meloni namás llograra’l 4,3% de los votos? La pandemia, la crisis enerxética cola suba de los precios pola guerra n’Ucraína, la fienda ente los ricos y los probes, el blanquiamientu del fascismu por determinaos medios… provocaron que l’electoráu nun votare cola cabeza.

Ye preocupante que los Hermanos d’Italia, que van llograr upar a Meloni como la primer presidenta italiana, tenga puntos en común cola Polonia de Mateusz Morawiecki, la República Checa liderada pol ministru Petr Fiala, la Francia de Marine Le Pen o la Suecia de los Demócrates suecos, el partíu antiinmigración que vien de convertise na segunda fuerza política del país. Por nun falar de les conexones qu’esti partíu tien col partíu d’ultraderecha, Vox. Dambos dicen que la violencia nun tien xéneru, pero sí raza, pese a que los datos nun-yos dan la razón, quiciabes porque les mentires tán afitaes nos sos ADN. Amás, refuguen la inmigración y nun reconocen los derechos del coleutivu LXTBI.

Nun ye solo que Meloni almire a Viktor Orban, el primer ministru húngaru, conocíu poles continues violaciones del Estáu de derechu, el nepotismu, la corrupción y por acabar cola llibertá nos medios de comunicación, sinón que dende moza almira al dictador Benito Mussolini, del que diz que foi un «bon políticu», magar que suprimiere los medios de comunicación, aboliere los partíos opositores y xestare un réxime totalitariu. Y por esta asemeyanza col fascismu recuperó’l so lema «Dios, patria y familia» de los tiempos más oscuros d’Iitalia. El casu ye que cuando Mussolini cambió’l rumbu de la historia fízolo con una amenaza. Delantre de 40.000 camises negres dixo que marcharía sobre Roma si nun-y entregaben el Gobiernu, y llogrólo. Esta forma de llegar al poder, tan diferente de Meloni, convirtiólu nel pioneru de les dictadures que vinieron darréu: España, Bulgaria, Turquía, Portugal y Alemaña. La so llegada al poder foi la causa indirecta de la muerte de más de 60 millones de persones na Segunda Guerra Mundial ya que marcó’l camín de Hitler: «Los camises marrones probablemente nun esistieren ensin les camises negres».

Meloni almira tamién al ex presidente Trump, que talamente paez que copió de Musollini la forma «illegal» de llegar al poder. La principal conclusión del Comité del Congresu ye clara: animó a una caterma de los sos siguidores pa qu’entraren a la fuerza nel Capitoliu. Nun llevaben nin camises negres, nin marrones, nin azules, sinón que dellos diben amazcaraos como’l grupu Village People, y anque por fortuna a lo cabero nun llogró’l poder pola fuerza, Trump amenaza con llevar la so ideoloxía d’ultraderecha otra vuelta al so país. Esperamos que la victoria d’otru partíu ultraconservador, anque seya nun país européu, nun seya contaxosa.

Meloni tien qu’agradecer en parte el so trunfu a la lliteratura. Buscaron una forma más fecha a los tiempos que citar discursos de Mussolini y pintar esvástiques con aerosol. En 1977 el so partíu creó un festival al que llamó Camp Hobbit pa dexar atrás los vieyos símbolos y capitalizar l’aisllamientu y el refugu que recibíen per parte de la xente d’izquierdes. En vez d’escoyer como héroe al guerreru Aragorn, foi’l pequeñu hobbit l’escoyíu pa desterrar la imaxe militarista que-yos restaba votos. A Meloni, que se facía llamar «dragonina del undernet italianu» cuando yera una moza, présta-y la lliteratura fantástica, polo que considera a El Señor de los aniellos un llibru sagráu que defende les tradiciones frente l’amenaza de fuerces escures. Y como la «dragonina» futura primer ministra d’Italia nun ta d’alcuerdu colos valores del colectivu LXTB, cuando Disney insinuó que na película Frozen 2 la protagonista podría ser el primer personaxe non heterosexual, lo que contribuyiría a acabar con munchos prexuicios, escribió nes redes sociales:«¡Yá valió! Manes fuera de los neños» 

La ideoloxía antifeminista, antiislamista, antieuropeísta y homófoba de Meloni esmolez muncho, pese al so discursu serenu y conciliador de la nueche de les elecciones. El peligru de que llegue la ultraderecha acecha en toa Europa, una ideoloxía que pue acabar coles llibertaes y l’Estáu de bienestar que tanto costó llograr.