Gloria Fuertes, la célebre poeta que l'alcalde d'Uviéu nun quier nel caleyeru

Güei voi alcordame de la poliédrica y combativa Gloria Fuertes que, a pesar de la so valía, el Partíu Popular y Ciudadanos nun permiten que tea presente nel caleyeru d’Uviéu. Gloria foi una escritora «autodidacta y poéticamente desescolarizada» que siempres remó escontra corriente y qu’emplegó l’humor, una forma crítica de deconstruir la realidá y descubrir la verdá, pa llegar a tol mundu y non solo «a cuatro intelectuales, liricoides, técnicos-críticos, fríos o ñoños».

El so nome ta xuníu a dos movimientos lliterarios: la Xeneración del 50 y el Postismu, grupu lliterariu de posguerra de la vanguardia. Amás de poesía, la so obra abarca tamién cantares, teatru infantil, cuentos... munchos d’ellos destinaos a los más pequeños de la casa, el públicu que consideraba más especial y agradecío, anque tamién más difícil; de toles formes, ye obligao destacar la so poesía p’adultos.

Fuera d’España Gloria Fuertes ta considerada una poeta fundamental de la posguerra española. N'Estaos Xuníos hai hasta 12 estudiosos especializaos nella y docenes de tesis doctorales. En Noruega, la so semeya foi imaxen de la cola d'aviones de la flota de Norwegian Airlines, una de les personalizaciones con más éxitu. Amás, el 28 de xunetu de 2016, Google conmemoró’l 99 aniversariu del so nacimientu con un doodle que representaba a la escritora cuntando cuentos a unos neños.

Son tamién numberosos los estudios sobre la so poesía social y sobre'l so especial estilu, qu'entemez lo real y lo ficticio, nel so rompedor llinguaxe. El dramaturgu Francisco Nieva reconoz qu’escribió bona y ambigua poesía y que dibuxa sobre «una alfombra de diseñu grotescu y tráxicu» les situaciones risibles. Nuna dómina onde les muyeres taben en segundu planu, namás Gabriela Mistral y Gloria Fuertes fueron incluyíes na Antoloxía Norton que recueye a «cien poetes en llingua castellana».

De fechu, en lliteratura infantil ganólo casi too, incluyíu'l Premiu Hans Cristian Andersen, el Nobel de la lliteratura infantil, yá que baxo l’aparente cenciellez ya inocencia, los sos poemes infantiles escuenden fondos y reivindicativos mensaxes.De la so obra ye obligao destacar nos años 50Poesía ignorada (1950), Aconsejo beber hilo (1954) y, más llueu, Poeta de guardia (1980).

A Gloria tocó-y vivir nuna España casposa y en blanco y negro, marcada pola dureza y represión de la Guerra Civil, onde «la fame, el fríu y la incertidume fueron pa ella un puntu d’inflexión». Nació poeta y vivió gracies a los versos, que llamaba «palombos» y que sacaba del so «sombreru ablucáu», a pesar de que sabía que yera una macla dedicase al mundu de la creación artística. La so poesía yera «descalza, desnuda, rebelde, ensin mázcara, igual que la propia autora». En xeneral, la so obra ye «yoísta», incluso mui «glorista», tal como ella mesma diz.

Poeta nuna dómina na que les muyeres nun teníen malpenes llugar na vida pública d’España, nin na lliteraria, nin en nenguna otra faceta, foi una gran defensora de los derechos de les muyeres y tamién d’otros sectores sociales menospreciaos, como los persiguíos o los homosexuales. Pue presumir de munches etiquetes: antifranquista y pacifista dafechu declarada, amosó'l so fondu desalcuerdu con conflictos del momentu como la guerra civil -«Lo único bono que me dio la Guerra Civil foi que me fizo pacifista y que me dexó un poco de metralla nel muslu»-, la guerra de Vietnam o la guerra de Camboya. Ella siguió «ente fusiles y pistoles ensin manchase les manes».Tamién foi defensora del mediu ambiente y poeta social, porque «nun basta defender a los esplotaos, hai que curar al esplotador les sos tisis de egoísmu».

Ello ye que yá con cuatro años escribía cuentos y facía dibuxos p’acompañalos. So ma reñíala cuando la vía escribir, pero ella tenía claro que diba dedicase en cuerpu y alma a la escritura, «si vales de verdá y quies dalgo con toles tos ganes, sales alante de xuru». Pese a ello, nun foi bona estudiante y dexó la escuela a los 14 años, anque so ma matriculóla na Escuela del Hogar y Profesional de la Muyer, onde recibió la formación qu’entós se consideraba necesaria pa una futura ama de casa, dalgo qu’ella nun taba dispuesta a ser enxamás, pero sí escritora, escribiendo versos en papelinos, serviyetes… yá que «vía poesía perdayures». A so madre nun-y gustaba que practicare'l hockey, un deporte miu poco femenín, y reñíala si la vía ller o escribir. 

Una nueche qu’acompañaba y ayudaba a so madre na llimpieza de la redacción de Lecturas (revista entós de caráuter cultural) dexó na mesa del director un poema que-y publicaron una selmana depués. Ella tenía 14 años y el poema titulábase Niñez, juventud, vejez. A los 15 yá lleía la so obra en Radio España de Madrid y a los 17 dio forma al so primer llibru de poemes, Isla ignorada, asoleyáu en 1950. Pasín a pasín foi collaborando con revistes infantiles y tamién p’adultos como Rumbos, Poesía Española y El Pájaro de Paja y compatibilizando la escritura con otros trabayos que-y permitíen nun morrer de fame.

En 1947 ganó’l primer premiu de «Letras para Canciones» de Radio Nacional d’España y empezó a recitar poemes na radio. Tamién fundó con otres escritores el grupu «Versos con Faldas» pa fomentar la llectura ufriendo recitales en distintos cafés. Ocho años depués matriculóse en biblioteconomía y inglés nel Institutu Internacional. Ellí conoció y enamoróse de la directora y traductora d’inglés, Phyllis Turnbull, el gran amor de la so vida. Nos 15 años de la so rellación tuvo una intensa vida social arrodiada d’escritores y académicos. Nesi tiempu creó una Biblioteca Infantil Ambulante p’averar la lliteratura a neños y neñes.

Gloria Fuertes foi única pa munches coses: siete años depués algamó una beca Fullbright y coló pa Pensilvania, onde dio clases de lliteratura española, siendo esta la primer vez qu’entró nuna universidá. Nos años 70 alcontró la forma de ganase la vida escribiendo pa los más pequeños y tando nos medios. Collaboró activamente en dellos programes infantiles de TVE, siendo Un globo, dos globos, tres globos y La cometa blanca los que la ficieron célebre, recibiendo en cinco ocasiones l’Aru de Plata de TVE. Y vinieron les llectures, los recitales, los homenaxes, les publicaciones.

Ganó dellos premios y accésits polos sos cuentos y poemes. Con too y con ello, cuando morrió en 1998 nun cuntó cola reconocencia de la mayoría de los collacios poetes,dalgo que la disgustaba sobremanera, porque yera reconocida namás como poeta pa neños y non p’adultos debío a la popularidá televisiva y a la so estensa lliteratura infantil. El casu ye que como malpenes gastaba, probablemente debío a la so «infancia probe», dexó tola so fortuna -100 millones de pesetes- al orfanatu de «Ciudad de los muchachos» del padre Jesús Silva,yá que foi relixosa a la so manera: «Dios y el botones saben que nun soi tonta». Tolo contrario, foi una muyer esceicional.

Pues a esta muyer tan célebre, particular y esceicional quíten-y la so cai n’Uviéu porque Alfredo Canteli nun la considera de suficiente valía como pa rendi-y homenaxe dando’l so nome a una cai de la ciudá, dalgo tan roino ya inxusto que la ciudadanía d’Uviéu nun tendría que consentir.