Premiu Nacional de Lliteratura Asturiana

El Premiu Nacional de Lliteratura Asturiana concédelu l'Academia de la Llingua Asturiana (ALLA) a los escritores con más trayeutoria en llingua asturiana. Tá dotáu con 3.000 euros, un medayón del escultor Adolfo Manzano y la espublización d'una antoloxía representativa del premiáu.Ye un gallardón triañal.

Nes sos bases l'ALLA espláyase nel sofitu a la normalización llingüística y cultural fecha pola lliteratura n'asturianu y el so algame a tol dominiu llingüísticu.

Si'l primer añu foi premiada la obra n'asturianu más tornada a otres llingües, esti añu ameritólu la mayor producción lliteraria, con más de trenta llibros.

Representa un fitu na axenda cultural del país, qu'amuesa la normalidá de cellebrar al más altu nivel la lliteratura propia. Equiparándose d'esti mou a los Premios d'otres llingües de prestixu internacional. Los nomes de los premiaos sedrán recordaos poles xeneraciones que vienen y la so obra xubirá a lo cimero de la creación d'esti Pueblu. 

La lliteratura, pallabra que vien del llatín litterae y fai referencia a la sabencia pa lleer y escribir de mou afayadizu, ye una creación que surde de los raigaños de la xente que fala l'idioma d'un territoriu.

Magar ello, el premiu que daveres se merez ye'l que bien reclamando dende va más de 40 años. Que nun ye otro que la oficialidá del idioma que festexa esti Premiu Nacional de Lliteratura Asturiana. Ye'l finxu qu'espera llantase na picorota más valoratible del valir inmaterial d'esta tierra. 

Del puxu efeutivu que tenga nel nuesu Parllamentu dependerá que seya nesta llexislatura (na que llegalmente fai falta un diputáu más p'aprobala, o seya 27) o na viniente, pa que seya contemplada como nes otres comunidaes con llingua propia.

La posibilidá del preste parllamentariu ye la mayor de la nuesa hestoria. Nun hai que decayer nel llogru d'un consensu que la faiga realidá.