Santa Bárbara bendita y les pandemies por llegar

Nos postreros 30 años el númberu de brotes d'enfermedaes infeicioses detectaos multiplicóse por trés. Acéchennos milenta virus con potencial de provocar pandemies globales de grandes proporciones. Dende va tiempu son munches les voces nel mundu de la investigación y de la medicina que lleven alvisándonos del riesgu de pandemies. Keiji Fukuda, exdirector de la OMS diz que la humanidá «esquivó una bala» debío a la combinación de la preparación, l’acción rápida y la bona suerte. Nesti momentu’l númberu de muertos pol coronavirus son d’unes 100.000 persones, comparable cola Gran Peste de Llondres del sieglu XVII. Cifres lloñe de la la peste medieval, na que morrió ente’l 40 y el 60% de la población europea y de la gripe española de 1918 que s’espardió per tol mundu destruyendo la vida d’al menos 50 millones de persones. Ante l’amenaza de nueves foles de pandemies, necesítase estender ya invertir nuna sanidá universal, publica y más sostenible. L'Oxetivu de Desenvolvimientu Sostenible númberu 3 de les Naciones Xuníes apuntaba pal 2030 una «cobertoria de salú universal, incluyida protección de riesgu financieru que facilite l’accesu de toles persones a servicios esenciales d'atención médica de calidá y accesu a medicines y vacunes esenciales que seyan segures y efectives».  

Na actualidá viendo la gran mortandá que puen causanos los virus, nun hai dulda de que «la salú nun tien preciu y quien l’arriesga ye un neciu». El problema xurde cuando los políticos, que tendrien que liderar esta situación y coordinar un plan global, amosen actitúes irresponsables; nun almiten fallos, atribúyese tolos méritos a sí mesmos y les culpes a los demás. Asina, cuando Donald Trump llegó a la presidencia, fizo recortes drásticos a les axencies gubernamentales que trabayaben pa detener los brotes letales nel so orixe, ensin decatase que les postures correctes ya intelixentes pasen pola coordinación y la solidaridá: los países con más perres deben invertir más n’ayudar a los países con menos ingresos. Per otru llau, na enfermedá del ébola en 2014, tuiteó que los trabayadores humanitarios norteamericanos nun volvieren pa América del Norte, como si pudiera poner muries a los virus y bacteries. Anguaño nun queda yá nenguna zona libre d’enfermedaes. Pardis Sabeti, un destacáu investigador d'enfermedaes contaxoses de la Universidá de Harvard, alvierte que la infección viaxa en 36 hores dende les zones rurales más perdíes hasta cualesquier ciudá con millones de persones, enantes de que los gobiernos tengan la posibilidá de prohibir vuelos, debío principalmente a los aviones, que son verdaderes incubadores de virus. Ello ye que solo con soluciones interconectaes podemos derrotar a les pandemies que nos amenacen. Nesi sentíu, va tres años, Bill Gates alvirtió de que, a nun ser que tomemos midíes drástiques, un patóxenu pue movese pel aire y tresmitir a toles grandes capitales del mundu en 60 díes, y al cabu de 250 díes podría matar a más de 33 millones de persones. 

Cola verdá llégase a toles partes, diznos la sabiduría popular española. Les persones necesitamos confíar na ciencia y nes autoridades públiques, pero resúltanos difícil cuando dalguién niega la realidá. El propiu Trump y Bolsonaro en Brasil minimizaron la crisis del coronavirus qu’acabo trayendo desastroses consecuencies. El gobiernu de Turkmenistán niega la pandemia y detien a quien fale en públicu o lleve mascarilla, mentanto l’ultraderechista Orbán, presidente d’Hungría promulga midíes qu’amputen la democracia pa gobernar por decretu con poderes extraordinarios. D’otramiente, ALexander Lukashenko, presidente de Biolorrusia, propuso sauna, beber vodka y practicar hockey sobre xelu p’acabar col coronavirus. Otros políticos, como López Obrador, nun principiu refugaron tomar midíes drástiques. Per otru llau, Boris Johnson nel Reinu Xuníu pasó de dar prioridá a la economía, ensin importa-y sacrificar a les persones más vulnerables, a acabar él mesmu na UCI. 

Hai un refrán que los asturianos conocemos a esgaya, n’especial nel mundu mineru, que diz que «namás t’acuerdes de Santa Barbara cuando truena». Pues en cuestión de pandemies, necesitamos iguar munches situaciones si queremos que vuelva a rellumar el sol.