Un millón d'especies amenazaes

Un informe hestóricu de la ONX afita que l'home yá punxo en pelligru de desaniciu a un millón d'especies. La sesta estinción masiva na Tierra. Más del 33% de los mamíferos marinos, el 40% los anfibios y el 33% los corales van esapaecer si nun se pon frenu a les actividaes humanes que desfaen la natura a la gueta d'alimentu y combustible pa una especie superpoblada: la humana. La llista sigue: el 75% los ecosistemes terrestres y el 66% de los marinos yá s'alcuentren «gravemente alteriaos». Amás, un 85% los humedales qu'hebo en 1700 perdiéronse.

IPBES, la Plataforma Intergubernamental de Ciencia y Política sobre Biodiversidá y Servicios d'Ecosistemes, compuestu por 400 espertos de 50 estaos y patrocináu por varies axencies de la ONX enumberó los 5 puntos que puxen pol cambéu na natura del mundiu.

Cambeos nel usu de la tierra y la mar d'abonda repercusión....

Sacrificáronse 100 millones d'hectárees de viesca tropical pola mor de la ganadería y l'aceite de palma. Al rodiu d'un terciu de la superficie terrestre y trés cuartes partes del agua dulce dedíquense a la producción agrícola o ganadera. El 25% los gases ivernaderu prodúcense de la deforestación. Les fasteres urbanes duplicáronse dende 1992 escontra la biodiversidá.

Cincante a la esplotación direuta d'organismos.

La humanidá xorreció dende 1970 de 3700 a 7600 millones col aumentu del consumu que ta anguaño en 60.000 millones de tonelaes de recursos anovables y non anovables. Xunto a un gran impautu nos océanos pola sobreesplotación de pexes.

Pol cambéu climáticu.

La temperatura yá medró 1º C en 2017 dende la dómina preindustrial. Poro, los fenómenos metereolóxicos estremos y los fueos xorrecieron nos caberos 50 años. Y el nivel mediu de la mar xubió 18'5 cm dende 1900. Asina que la metada de los arrecifes coralinos perdiéronse dende 1870, amenazando tamien a la metada de los mamíferos terrestres en pelligru y cuasi al 25% de les aves en pelligru de desaniciu.

La contaminación.

Ye la causa tresversal de tolos factores que puxen escontra la biodiversidá. Los plásticos, metales pesaos, solventes y borrafes tóxiques industriales vertíos al agua mataron grandes estensiones marines. Los microplásticos y otres micropartícules entá tienen un efeutu desconocíu nos seres vivos al traviés de les cadenes trófiques.

Les especies exótiques invasores.

L'incrementu del tresporte aéreu y marítimu conllevó al de les especies exótiques invasores nun 40% dende 1980. Una quinta parte de la Tierra ta afeutada pola reducción de les especies natives por esta sida.

L'informe, resumíu por Laura Quiñones, propón como igua'l cambéu de la nuesa interaición cola natura.

Nes aiciones na agricultura, con bones práutiques y xestiones sostenibles, la tresparencia del mercáu y el sofitu a les comunidaes llocales.

Nos ecosistemes marinos, cola meyora na xestión de la pesca, la ordenación del territoriu, fasteres marines protexíes y amenorgamientu na contaminación.

Nos ecosistemes d'agua dulce, xestión de mayor equidá, amenorgar la erosión del suelu y la sostenibilidá de les polítiques hídriques globales.

Nes árees urbanes, más accesu a los servicios urbanos, entornos saludables con más espacios verdes, llinies de consumu sostenibles y conexón coles especies natives.

La mocedá, siguiendo'l llamáu de la estudiante sueca Greta Thunberg, ta movilizándose por millones en tolos países pola tresformación na vida del mundiu. Puxar por ella ye puxar pol planeta.