Xentrificación asturiana

Nes ciudaes dase esti fenómenu de la xentrificación. Y Asturies nun ye una esceición. 

La xentrificación vien del inglés «gentry» o alta burguesía. Ye un procesu posmodernu que provoca cambeos nes ciudaes de mou que  la xente rico sustúi a la xente que vivía nesi llugar. Ye bultable en Poniente, Xixón.

Esti procesu orixinóse nos años 70 del sieglu pasáu nos Estaos Xuníos pero amuesa gran intensidá na cabera década. Cola crisis, les inmobiliaries invierten nos centros degradaos de les ciudaes. Llueu puxen los precios y los vecinos de tola vida han de dise a llugares menos caros, al quedar desprotexíos énte´l desaniciu de les rentes antigües, los desallugos y la especulación de los propietarios.

Non solo ye pol porgüeyu de les cadenes internacionales, sinón tamién pola presión del turismu de mases, como asocede en Llanes.

El desendolque urbanu d'Avilés representa la evolución del fenómenu nes ciudaes perifériques de la industrialización col espoxigue nos años 50 del sieglu pasáu pola mor d'ENSIDESA. Nuna década pasó de 21.000 a 49.000 habitantes . Poro, improvisáronse nuevos poblaos y barrios pa los trabayadores, ensin planificación. Dende 1970 densificóse'l centru con nueves viviendes privaes qu'esaniciaben les esistentes hestóricamente, de siesgu especulativu, en función de les estremaes categoríes llaborales. El seutor terciariu compensó la perda de trabayu de la siderurxa, calteniendo la ciudá nos sos 85.000 habitantes. Anguaño hai una anovación de la ciudá al rodiu la ría, col centru Niemeyer como finxu, que quier camudar la degradación y la contaminación de la fastera pa dinamizala y meyorar la calidá de vida avilesina.

Los desallugos son el conflictu que trai un turismu mal reguláu. Los alquileres xuben asgaya nos caberos años n'Asturires colo que s'amplía esti problema al nun esistir polítiques sociales pa igualo.

La llei refuercia la situación al facilitar los desallugos con facilidá. A esti pasu nun van quedar viviendes que seyan quien a pagar les clases medies emprobecíes, por nun falar de la mocedá que va tiempu que fuxó a la emigración.

El problema de los alquileres antiguos ye que tán deseyando desfacese de los inquilinos, xente mayor que vive en pisos en mal estáu, con munches presiones pa dexalos.

Un cambéu nesa tema ye precisu pa que nun arraigone más esti procesu d'orixe européu y americanu n'Asturies.